Parlamentario sra. Lorna C. Varlack
ORANJESTAD(AAN): Sin kita of pone esunnan responsabel pa e deficit monstruoso den e presupuesto di 2010 ta e gobierno anterior di MEP, gabinete Nelson Oduber III. Malgastamento di placa, sumanan gigantesco paga na “friends and family”, falta di transparencia, falta di responsabilidad pa cu nos economia en general y un negligencia di e pueblo di Aruba a hiba e pais aki den un abismo cu ainda nos no por mira e bom. Ainda durante di tratamento di e presupuesto oposicion kier pretende cu ta e Gobierno di Mike Eman I ta culpabel.
Cu tur sorto di pretexto, introduccionnan largo sin contenido, preguntanan sin base, asina nan ta purba sconde tras di nan propio fayonan. Diripiente nos por a scucha preguntanan di exministernan cu ta laga bo pensa unda nan tabata pa 8 aña largo si nan no tabata disponi di informacion cu nan kier haya awor. Un berguensa total di nan banda.
Pueblo conciente ta puntra ken cu un mente sano ta bay kere cu un gobierno cu ta gobernando pa 6 luna por ta responsabel pa e disaster aki. Awor oposicion no kier pa nos referi na pasado, pero esey ta e unico manera pa evita pa ripiti e erornan aki den futuro. Ex parlamentarionan y ex ministernan di MEP ainda ta kere cu nan ta goberna y cu tur cos mester bay manera nan a goberna pa 8 aña largo.
Pueblo a vota pa un cambio di maneho, innovacion den gobierno, cambio den e sistemanan anticua. Hende mester cuminsa acepta cu no pasobra algo a bay na un manera pa hopi aña cu automaticamente e mester sigui asina. Pueblo sigui evalua e situacion desastroso aki pa boso mes y saca boso propio conclusion. Oposicion ta sinta cu un proposito y esey ta pa stroba e desaroyonan positivo cu nos Gobierno di gabinete Mike Eman I ta trece pa nos pais.
Nos tin e futuro di e pais y nos generacionnan na pecho y nos lo hasi nos maximo esfuerzo pa sali for di e situacion financiero deplorabel aki cu e gobierno anterior concientemente a laga nos aden.
