Escritor Arubiano Ta Participa Na St. Martin Book Fair
ORANJESTAD (AAN): E autor y poeta Arubiano Quito Nicolaas, biba na Hulanda, lo tene e charla How to identify Aruban literature today na e di ocho edicion di e St. Martin Book Fair di 3-5 di Juni, 2010 na St. Maarten.
Durante e charla cu lo tuma luga na Universidad di St. Maarten e lo trata literatura Arubiano den e contexto di e procesonan socio-historico di Aruba.
A base di e concepto di Imagologia (sciencia cu ta analysa representacion cultural ariba imaginacion di pueblo, cultura y comunidad) e lo analisa obra di e escritornan Ernesto Rosenstand, Frank Williams y Jossy Tromp. Fuera di esaki e lo enfoca riba e autornan Arubiano, biba na Hulanda, cu ta skirbi na Hulandes y Papiamento.
Aparte di e charla e lo bay bishita diferente schoolnan secundario na Philipsburg, entre otro Leonard Connor Primary School, na unda e lo papia encuanto su obranan di poesia, su experencia cu skirbimento, e balor di lesamento y e rol di literatura den comunidad. Durante e programa cultural, e lo bay ta declamando diferente di su poemanan. Tambe e lo ta presente na e St. Maarten Public Library pa firma su bukinan.
Quito Nicolaas ta conoci pa su tomo di poesia Destino, Gerede twijfels, Atardi di Antaño y su ultimo obra Alameda. E ta skirbi na Papiamento, Hulandes, Ingles y Spaño. E ta gran promotor di uzo di Papiamento como lenga. Na 2004 su prome obra na Papiamento riba tereno di prosa Tera di silencio a ser publica. Cu su charlanan na Hulanda y na otro parti di Caribe e ta duna atencion amplio na literatura Arubiano y ta stimula vision y skirbimento na Aruba y Hulanda. Actualmente e ta trahando riba un obra na Hulandes cu lo sali otro aña.
