Jan van der Straten ta bira Coordinador Nacional di Droga
ORANJESTAD (AAN): Despues di termina cu su contract cu Ministerio di Cultura pa e trabou na Direccion di Cultura, awor Jan van der Straten ta cla pa su siguiente reto. El a keda apunta como e Coordinador Nacional di Asuntonan di Droga. Den e funcion aki, cu den pasado tabata wordo ocupa dor di Eric Nassy, e ex-Comisario di Polis lo tin di haber cu tur e instancianan y departamentonan di Gobierno cu ta atendiendo cu e tema complica di droga. E acuerdo nobo cu Jan van der Straten na Miniserio di Salubridad Publico y Deporte ta drenta na vigor dia 15 di juni proximo, aunke cu e lo keda yuda den e Ministerio di Asuntonan Social, Asuntonan Economico y di Cultura pa algun ora pa siman.
Minister di Salubridad Publico, dr. Richard Visser a anuncia un maneho nobo riba tereno di adiccion y combatimiento di droga. Den esaki a cuminsa cu manda e adictonan problematico y ambulante voluntariamente pa Santo Domingo pa rehabilitacion na Hogares Crea. Hunto cu Fundacion Adopt an Addict e mandatario a traha man den man pa logra manda mas adicto posibel. Sinembargo, a tuma nota cu e trabounan aki ta cruza door di diferente departamento di Gobierno y no tur ta resorta bou di e mesun Ministerio.
Cu e reto aki den mente, a pensa den aserca un persona manera Jan van der Straten cu tin hopi conocemento den con e sistema ta funciona den Gobierno, un persona cu conoce e forma di traha di departamentonan y un persona cu e respet y integridad pa por encabeza e proyecto pa yega na un maneha integral di asuntonan di droga.
Jan van der Straten mes no kier a bay den mucho detaye riba e asunto aki ainda, pero si a confirma cu el a acepta e funcion aki y cu e lo cuminsa traha dia 15 di juni proximo bou di e Ministerio di Minister Richard Visser y cu algun proyecto cu lo continua di Minister Michelle Winklaar.
