Home Editorial Menaza di Kima Aruba?

Menaza di Kima Aruba?

4
0
SHARE
- Advertisement -

jossy_mansur_pic              Awor cu e cabuya a cuminza preta y un grupo di abusador a compronde cu nan por bay haci un pasantiya na KIA, di biaha bo ta tende tur clase di disparate via nan Radio Riool. Un di e bril di palonan di nan grupo aparentemente a yama pa bisa cu mester kima bestuurskantoor cu tur e Ministronan aden, y otro cu mester sigui e ehemplo di Curaçao dia un grupo di radical a pone e pan di tur Curazoleño na peligro. A tuma e isla hopi decada pa recupera completamente di e sla casi mortal cu su mesun hendenan a propine. Pero, esey no ta interesa e radicalnan! Tur loke nan kier haci ta purba para e accionnan penal cu ta na caminda, sin importa nan un bledo lanza nan menazanan di kima Aruba y sin preocupa nan mes kico lo pasa cu e resto di poblacion.

             Hecho ta cu for di e seno di MEP ta surgiendo voznan cu ta cucuya pa purba crea desorden publico riba nos isla. Di antemano mi por bisa nan cu e berdadero Arubiano ta stima su isla mas di loke nan ta kere o por imagina, pasobra pa nan por ta cu Aruba no ta nan patria sino un baca lechero productor di placa pa nan saconan. Pa e resto di poblacion, cu ta e mayoria abrumador, Aruba ta nos isla, nos orguyo, nos lugar di residencia. Loke mi no por imaginami ta pakico tur e hendenan ey ta celebra dia 18 di Maart, cu ofrendanan na nos bandera, nos himno y nos escudo, den actonan hipocrita cu ta simula un patriotismo valido. Awor, e canalnan di Radio Riool ta habri pa acepta tur clase di amenaza contra e trankilidad y e bienestar di Aruba y su Pueblo.

             Mi no sa si Ministerio Publico ta sigui na soño o comprometi cu MEP; mi no sa tampoco si DTZ ta mes entreguista y anti-Arubiano cu e gritadornan na Radio Riool, pero un cos ta cierto: e resto di poblacion ta bay keda alerta pa si bin cualke movimento den e direccion di disturbionan publico, y Ministerio Publico no actua, anto ta Pueblo mes lo mester enfrenta y derota e man yen di MEPistanan cu ta desea e destruccion di nos isla. Un par di nan ta grita pa un 30 di Mei na Aruba, y pa kima Bestuurskantoor cu tur e Ministronan aden, sin cu e responsablenan di e radio ta controla o para nan. Agitacion ta un ofensa serio contra Ley y e castigo ta mas severo di loke nan ta pensa.

             Na Aruba mi ta duda cu lo tin mas di un par di desalmado cu lo no hesita pa destrui loke a tuma tanto generacion di Arubiano construi. Pero, nos no ta Curaçao! Esun cu tribi di lanta un man contra nos isla lo haya un para formal for di e resto di poblacion cu no ta kere cu mester kima Aruba pa evita cu Edmond, Endy, Marisol, Nel, Booshi, Nilo, Eddy y similarnan paga pa loke nan por a haci robez durante ocho aña di plundermento. Pa stop e investigacion cu ya ta yegando su fin ningun accion na radio riool o den Solo di Corupcion ta bay yuda. E unico manera di pare ta demostra cu hechonan concreto cu bo ta inocente di loke sea bo ta ser acusa. Y keremi, polis ta bon al tanto di loke ta sosodiendo, o sea e agitacion (ophittserij) na un radio degradante y porkeriyero. No mester descarta cu si DTZ y Ministerio Publico no actua, nan si ta bay pone man na obra y pone un fin na e tipo di agitacionnan ey cu por resulta den desordennan publico. Den e caso aki, mi ta sigur cu polis lo actua cu cero tolerancia!

            Parce cu e grupito di malbadonan cu a daña pa MEP no kier compronde cu Aruba no ta di nan; e no ta e baca lechero pa chica placa pa hinca den e saconan di un solo famia cu a bira multi-miyonario riba e custia di Pueblo. Ta Pueblo mes a pone un fin na nan bagamunderianan. Awor e investigacionnan ta yegando nan fin y pronto acusacionnan lo cay. Ningun gritamento na radio ta bay para e accionnan cu ta na caminda. Laga esnan cu tin nan consenshi sushi enfrenta e consecuencianan di nan actonan, y compronde bon cu Pueblo no ta bay subi caya pa salba nan, no ta importa con duro nan grita na radio, ni cu cuanto amenaza nan bin. Pueblo no ta bobo! E sa masha bon ta pakico nan a cuminza cu agitacion, y mi ta sigur cu tur esnan cu ta stima nan isla riba tur otro consideracion politico, lo sa di sali na su defensa ora e momento yega.

- Advertisement -

DUNA COMENTARIO

Please enter your comment!
Please enter your name here