Home Editorial MI RAIZNAN ARUBIANO!

MI RAIZNAN ARUBIANO!

8
0
SHARE
- Advertisement -

jossy_mansur_picLesando den DIARIO e articulo interesante y hopi ilustrativo di e talentonan di e conocido Oswald Wever, medico y musico, mi a dicidi cu awe mi ta bay pone Nel y e otro racistanan di MEP djindja bay gol, pasobra na lugar di muda pa Libano (pais cu nunca mi a yega di bishita) manera cu Nel ta insisti pa mi haci, ignorando intencionalmente den su pensamentonan miserable mi berdadero procedencia, mi ta bay papia brevemente di mi raiznan Arubiano. Raiznan cu Betico den mas di un ocasion a reconoce y elogia den telegramnan cu mi ta conserva cu e orguyo di un yiu di tera cu a admire sin reserva. Nunca Betico a referi na mi como Arabier (pa motibo di mi ascendencia Libanes, sino como un berdadero Arubiano!) Pesey e tabata y ta sigui goza di tanto grandeza, y Nel di tanto repudio.

                 Pa cuminza mi mester defini kico e palabra “Arubiano” ta encera, pasobra entre ‘pura cepa’ y e realidad sunu tin un distancia di varios mil kilometer. Pa mi, un Arubiano ta un persona cu a nace na Aruba, no ta importa di cuanto generacion, a crece den su ciudadnan o camponan, y a dedica cualke talento cu Dios por a dune na engrandece e aspecto ey di su isla. E no tin nada di haber cu ascendencia, antiguedad, color di cuero, religion o preferencianan. E no ta relaciona tampoco cu bo lugar di residencia, ciudad o campo, bo afiliacion politico o bo ideologia. E ta un realidad cu ta nace cu bo riba un isla bendiciona, ta biba den bo y ta inducibo canta e glorianan di e lugar cu a mirabo nace, y cu (den mi caso) ta bo escogencia pa ora e momento yega, bo bay laga e mundo aki pa e otro bida cu e Nazareno a priminti tur hende di bon boluntad.

                   Mi a nace den un cas chikito den e caya cu yama Korteweg. Mi a crece den un geografia capitalino, rondona pa famianan den vecindario cu semper mi a considera amigonan di berdad. Pazuid di nos cas (riba e refreskeria Oasis y situa dilanti di Rialto), e famia Oduber (shon Champi y su yiunan) tabata biba, y nos tabata hiba combersacionnan ameno di balcon pa balcon cu Rudy (tata di Otmar) y su rumannan. Un poco mas pariba di Rialto famia Osorio tabata tin nan bibienda y negoshi (La Venezolana), y nos dilanti, cruzando caya, mi ta corda Tushi y Bessie cu nan ehercito di yiunan, tres di cual ta casa cu mi rumannan Ruben, Sara y Miguel. Un poco mas pariba mi ta corda e vivienda di e mayornan di Oscar Henriquez, y bayendo abao e stacion di gasolin di Moki y su famia extenso, incluyendo Jenny, Dichi y Janchi, kendenan mi ta corda cu hopi mas claridad. Cerca di nan mi ta corda e costureria di Lucila, y mas pabao e vivienda di e Kalilnan, awe practicamente extinto na Aruba. E ambiente Arubianista di e temponan ey, a transforma lamentablemente cu e paso di añanan den algo ireconocible pasobra el a perde e encanto di su simpleza, su sinceridad, y e aire di union, amistad y comprension cu tabata forma nos den un solo Pueblo cu un solo ideal: traha pa e grandeza di nos isla.

                   Na un edad tempran, hopi prome cu mi a bay Merca, mi ta corda cu nos tabata miembro di Tivoli, unda nos a forma e mayor parti di e amistadnan cu a perdura y ta sigui vigente. Nos tabata hopi cera cu e famianan Arends (Oom Mai y Shon Tica, Dr. Loy, oom Machi y tan Veneranda, nan rumannan y yiunan, y tambe cu e famianan Lacle di Playa. Banda di nos cas, den direccion di Caya Grandi, e mayornan di Daphne (Zep Oduber y famia) tabata biba y riba e di dos piso, Dr. De La Fluente. Mi ta corda cu hopi claridad Dr. Cobito, Dr. Dussenbroek, Dr. Coco Arends y otronan cu ta forma parti di e recuerdonan mara cu cadena na mi hubentud.

                  Mi a crece den un ambiente capitalino, den contacto cu mundo interno y externo. Mi a caba zesde klas na St. Dominicus College prome cu mi a worde manda Merca na 1948, hunto cu Alex y Ruben, cu 14 aña di edad recien cumpli. Na Aruba mi tabata den e mesun clas cu Edwin Baez, Harold Kock, Harold Malmberg, Janchi Arends, y hopi otro, awe desapareci of ainda presente. Pa haci un esbozo di nan tur lo tumami por lo menos henter e corant aki, y mi ta prefera di hacie den un autobiografia, si algun dia mi sinta trahe cu e disciplina y energia cu e ta rekeri. Anecdotanan mi tin na granel di tur e hendenan cu den algún momento fugaz a cruza den mi bida, y kendenan mi ta corda y por describi cu bastante precision. Pero, esey ta materia pa un buki cu ohala mi por pone un banda e tempo y ainda tin e energia y disciplina necesario pa hacie.

                  Mi por describi ainda e Aruba cu mi a conoce di mucha, cu tur su sabor y colornan, su bida social y politico, pasobra na cas nos tabata ricibi bishitanan frecuente di Juancho Yrausquin, di Fifi, Kesi y Jani Eman, di Lopi, Ernesto Petronia y hopi otro politico local y di Curaçao prominente di nan tempo, hopi prome cu Betico a irumpi riba pantaya pa marca historia y cosecha beneficio grandi y gloria perene pa nos isla. Mi ta biba feliz cu e honor di a acompañe den su luchanan pa logra e Status Aparte tan maltrata pa esnan di su partido cu no merece ni sikiera menciona su nomber.

                  Mi raiznan Arubiano tey, solido manera e barancanan di Ayo, fuerte manera e kwiginan cu ta dorna nos camponan, y duradero manera e watapananan cu a cobiha nos cu nan sombranan den e dianan di calor intenso cu sa baha riba nos isla. Mi no conoce otro pais ni patria, mi no tin afiliacion politico pafo di Aruba, y mi a dedica loke Dios a concedemi como talento na mi isla, na cual mi a ofrece caba mas di 50 buki den nos idioma vernaculo, y mas di 25 adicional cla pa imprenta o bao revision. Ningun san Nel of e MEP di Nel por ranca e raiznan ey y planta nan riba otro suela cu mi no conoce. Den exterior nan conocemi solamente como un Arubiano, tanto den e ramo literario como esun di un voz mas cu ta canta e glorianan di nos isla, dorna cu e berdad di loke nos isla ta y loke nos Pueblo a gana merecidamente como hospitalario, decente y amante di paz. Pa mi, como yiu di tera, ta keda como orguyo principal di ta pertenece na un Pueblo berdaderamente digno di e respet y consideracion cu e ta disfruta den exterior.                

- Advertisement -

DUNA COMENTARIO

Please enter your comment!
Please enter your name here