Segun Minister Arthur Dowers:
“Tambe falta cooperacion y comunicacion entre instancianan concerni!”
ORANJESTAD (AAN) — Hunto cu Minister Arthur Dowers, Director di Biblioteca Nacional a topa cu funcionarionan di D.I.P, D.O.W y Comision di Infrastructura. Den entrevista cu e mandatario el a menciona cu na prome lugar e director di Biblioteca a duna un relato di kico ta e situacion di e lugar, cual ta bao di su responsabilidad. Asina e grupo concerni y e dignatario a haya mas claridad, entre otro, tocante e problema di airco.
Informacion cu e minister a haya ta cu e airco aki a ser instala algun aña pasa, pero e trabao no a worde haci na un manera optimal, esta mas of menos cinco pa seis aña pasa. Pa un trabao haci na mitad, segun e dignatario, awor biblioteca ta pagando e consecuencianan. Di otro banda, tin otro aspectonan cu ta dunando problema y cu e trahadornan ta señalando.
E dignatario ta considera cu den e situacion aki tin falta di un bon comunicacion entre tur e departamentonan envolvi, y pesey e tipo di trabaonan aki no ta worde haci na un forma adecua.
“ Mi ta compronde cu un director di biblioteca no por duna instruccion na otro departamento, mescos cu e departamentonan di D.I.P y D.O.W no ta cay bao di mi responsabilidad, y ami no por manda nan pa hacie e trabao. Pero nan ta instancianan cu ta facilita e trabao, y nan mester hopi mas mehor cooperacion y comunicacion cu otro, pa e tipo di cosnan aki no sosode”, Minister Dowers a señala.
E titular a lamenta cu tabata tin manifestacion di trahadornan, pasobra e ta sinti cu unda tin un director y tin maneho tumando lugar, si tin problema mester por comunica cu otro y duna perspectiva na un solucion.
“ Pasobra si e trahadornan para pafo y nan keda asina henter e siman aki, e lo tin consecuencia pa nan entrada, y e no ta bay cambia nada na e biblioteca. “ Kiermen, e tipo di problemanan aki mester worde analiza y soluciona na un forma structural y esey no ta pasando”, e mandatario a subraya.
Tambe Minister Dowers ta lamenta cu e situacion aki a bay asina pa tanto aña. “ Loke nos ta haciendo aworaki, sigur departamento di enseñanza bao cual Biblioteca ta cay, y departamento di Husticia, ta purba na yega na plannan structural, unda cu nos ta bisa ‘nos tin mester di tanto miyon Florin pa nos inverti den diferente proyecto cu nos tin, pa lugarnan cu ta den un decadencia total, y ora nos bin riba esaki mester bin prioridad”, e dignatario a menciona.
A keda demostra un biaha mas e actitud poco inteligente di e trahadornan di biblioteca. Ki sorto di hende ta esaki? Pa colmo e directora di biblioteca a mustra un biaha mas su ineptitud total. Esaki no ta tur cos: na unda e directora di Departamento di ensenjanza a keda? Kiko e personahe aki ta aporta na nos pais? Minister Dowers a duna un les di capacidad pa dialoga y goberna.