ORANJESTAD(AAN)–– E prome parti di un investigacion cu ta ser haci dor di Universidad di Aruba riba peticion di Coordinatiebureau Drugsbestrijding na nomber di Minister di Salubridad Publico y Deporte, Richard Visser, a keda entrega na Minister.
E investigacion ta ser realiza pa e seccion di ‘Center for Research & Development’ di Universidad di Aruba, y lo consisti di cuater parti cu lo analisa y investiga y cual proyecto ta carga e nomber di “Base-line assesment van de Drugsproblematiek op Aruba.”
E prome parti di e rapport aki, ta titula “Een sneeuwbal op Aruba; Illegaal drugsgebruik in Aruba en wat we kunnen doen om de situatie te verhelpen” y el a ser entrega na Minister Vissser dia 26 di april 2010.
Ta trata aki di un investigacion haci den diferente bario y sectornan di comunidad caminda a explora diferente situacion cu ta existi y a haci un inventarizacion cu cooperacion di 23 dirigentenan den tanto sector publico como priva cu ta trahando pa algun tempo caba riba tereno di cuido y drogadiccion.
E investigacion aki lo forma parti di e base cu lo bay determina e maneho di Minister pa loke ta trata cuido di drogadictonan. E lo duna un mihor idea di loke falta na necesidadnan primordial pa yuda esnan den problema y pa determina kico ta rekeri pa mehora institucionnan y acumula informacionnan necesario. Di e forma aki por dirigi un maneho preventivo efectivo, cual ta sumamente necesario.
E prome rapport ta menciona, cu como resultado directo di e investigacion aki, a percura pa acumula mas tanto informacion concreto posibel cu lo sirbi como e base pa fiha un maneho riba loke por ofrece pa cuido di drogadictonan.
Pa loke ta resultadonan indirecto di e prome fase di e proyecto aki, ta mustra cu mester yega na un red di cooperacion mas efectivo posibel y cu lo tin cu stimula e conscientizacion riba tereno di uso ilegal di droga y alcohol.
Minister Richard Visser a felicita e comision pa e resultado parcial aki cu sin duda ta contribui na e maneho cu Minister Visser y Gobierno lo bay implementa den e lucha contra drogadiccion aki na Aruba.
