Home Editorial Ritz Carlton: Si o no?

Ritz Carlton: Si o no?

2
1
SHARE
- Advertisement -

jossy_mansur_pic                  Mi a lesa e diferente opinionnan duna te awor tocante e hazaña nobo di Marisol cu a bay contra tur regla di bon gobernacion, y a yega na mi propio conclusionnan. Ata nan siguientemente, pa loke nan bal!

                    Mester mira e proyecto di Ritz Carlton for di dos punto di bista: un, su posible aporte (temporal) na e situacion financiero actual, y dos, su concordancia cu nos Leynan y normanan di administracion di e propiedadnan di Pueblo. Ban pone un banda momentaneamente e impopularidad grandi cu e tin cerca masha hopi hende di nos comunidad y mire for di un angulo pragmatico.

                    Ritz Carlton ta un hotel di fama na mundo, considera door di hopi como un di e miho cadenanan existente. E ta goza di un prestigio enorme y un popularidad grandi. Den esey no tin argumento posible contra su binimento Aruba. E problema no ta e importancia di e hotel como tal, sino e forma con el a yega na acuerdonan hopi cuestionable cu e Gobierno di e MEP di Nel. Preguntanan concreto tin pa contradeci e ponencianan di e mandatario mas cuestiona pa su decisionnan di favoritismo y complacencia di e Gobierno anterior, o sea e Marisol di Abundance, herencia y brug, entre tanto otro negatividad!

                  E cuestionamentonan ta hopi, y na nan lugar, y ta tira un sombra scur riba e forma con e proyecto ey a keda concretiza door di Sra. Abundancia.  Juan David a enfoca nan concretamente, no cu emocion sino cu nos Constitution y nos Leynan den su man. Laga nos repasa brevemente algun problema relaciona cune.

                 Tur hende ta al tanto cu e prome conseho huridico pidi a resulta desfavorable pa e revocacion di e proyecto, pero e di dos, traha pa un team di expertonan Arubiano, David Kock, Ronnie Wix y otronan di nan despacho di abogacia cu ta conta cu e aval di hopi prestigio y conocimentonan di Ley. E ta habri caminda pa den un forma legal precede den Corte pa solicita e revocacion di e acuerdo estupido y hopi cuestionable cu Marisol a cera cu e grupo promotor di e proyecto. Pakico? Pasobra e condicionnan original a ser cambia door di Marisol di tal forma cu nan a crea hopi duda y sospecha di asuntonan ‘scondi’  relaciona cune. Con por ta posible cu un acuerdo pa 25 miyon a para baha te na 5? Y con porta posible cu e consehero principal di Marisol (pa e proyecto aki tambe!) tabata alavez consehero di e grupo promotor di e proyecto? Acaso Sra. Abuncance no conoce e definicion di ‘conflicto di interes’, of lot a cu el a opta pa ‘otro’ interesnan mas personal?

                 Tin tanto otro asunto cuestionable den henter e procedure y cambionan introduci den e acuerdo cu Gobierno cu ta Parlamento tin cu bay dicidi riba e binimento of no di e hotel.

                   Personalmente mi ta totalmente contra pa e bin, y pa varios motibo.  Segun mi, ora bo analiza cualke proyecto cu ta incidi riba nos industria turistico, bo mester evalua bon si e ta pas cu e situacion reinante. Pa mi, e prome consideracion mester ta: e ta bay crea vuelonan adicional cu cuponan extra pa contribui na yena e cantidad di cambernan cu ta bin acerca? Si esey no ta e caso, ante loke bo ta haciendo ta tuma e cantidad actual disponible di asientonan cu ta ser comparti pa tur e hotelnan existente, y agrega un hotel mas pa haya su parti for di e mesun total ey, a sea cu su parti mester bin for di e disponibilidad di un o mas di e hotelnan existente. Segun mi, esaki ta e caso di Ritz Carlton pasobra te awor mi no a tende, ni lesa, ni a ser informa cu nos ta bay haya mas vuelonan pa trece mas turista for di e mercadonan tradicional o nobo pa yena varios centenar di camber extra.

                   E di dos problema cu mi ta vislumbra ta e lugar unda e promotornan ta exigi pa e bin, o sea na e ultimo pida beach cu a resta pa e recreacion di nos Pueblo, ademas di ta conoci rond mundo como un di e lugarnan ideal pa cierto tiponan di watersport. Fuera di esey lo mester bay sacrifica e fisherman hutnan cu ta un parti (te awor) integral di e area ey. Total pa logra kico?

                   Y den e analisis final, pa kico nos kier ser considera? Pa un pais dispuesto di negocia su principionan pa cualke posible alivio financiero temporal, of un isla unda Ley y Orden ta impera? Di mi parti mi lo scoge semper pa Orden y Ley! Ta algo concreto cu nos a hereda di Hulanda, y ni maske algun desorden sa lanta cabez aya de vez en cuando, mi ta sigui considere un pais digno di ser emula pasobra e tin un Pueblo cu un gran apego pa Ley y Orden. E ta admirable den tur sentido di e palabra.

- Advertisement -

1 COMMENT

  1. Senor Mansur,

    Estupendo editorial, mi ta admira Senor Mansur su punto di vista mirando e posicion di escritor, periodista y e mesun tempo como comerciante. Lesando e editorial cu hopi atencion, mester analisa e parti di e opinion personal di Senor Mansur encuanto e proyecto aki. Pakiko?… Di con?…. y na Unda?…. di e proyecto aki. Si e preguntanan aki ta hanja un contesta rasonable, concreto y na bienestar na e pueblo di Aruba, e ora ey e principionan di Ley y orden ta prevalece.

DUNA COMENTARIO

Please enter your comment!
Please enter your name here