School Scucha Nos Cu Bunita Obra Di Man Pa Bisti Riba Uniform
Awe ta Dia Internacional Boluntarionan Cruz Cora:
ORANJESTAD (AAN) — Juffrouw Monsanto, a duna prensa informacion tocante e bishita cu Cruz Cora a haci na School Scucha Nos, den cuadro di Siman Internacional di Cruz Cora y Dia di Boluntario di Cruz Cora cu ta wordo celebra awe.
Señora Monsanto a relata cu Cruz Cora, di cual e tambe ta miembro boluntario, a bin cu e iniciativa pa envolve e schoolnan den e Siman Internacional di Cruz Cora, pa concientiza e muchanan.
E comision a manda carta y e-mail pa schoolnan pa nan educa e alumnonan tocante kico ta Cruz Cora y kico e ta haci, y kico e ta nifica pa pueblo di Aruba; djis pa para keto un rato na e dia internacional di Cruz Cora, y tambe pa e muchanan colabora cu 50 cent, un florin, loke nan por, pa nan tambe sacrifica y siña di chikito duna na un persona cu no tin.
Tambe ta asina cu e alumnonan a traha algun obra di man den e contexto dia di boluntario di Cruz Cora, y sra. Monsanto a conta cu den e carta cu e institucion a manda pa e schoolnan, nan a pidi pa nan traha algo cora den forma di obra di man, pa nan bisti riba nan uniform.
El a comenta cu e docentenan a bira hopi entusiasma cu e idea y pesey mes e resultado logra ayera, tabata perfecto. El a acentua cu tur school cu a participa den e proyecto, ayera a bisti algo cora riba nan uniform.
