Seleccion venezolano a gana Britannia 4-2
ORANJESTAD (AAN)— Despues di a enfrenta e seleccion di Aruba y gana cu score di 3 pa nada, e seleccion di Futbol venezolano conoci como “La Vino Tinto” a enfrenta su di dos compromiso di fogueo Diasabra ultimo contra di e team Campeon di Futbol Division Honor 2009/2010, esta SV Britannia, wega cu a tuma lugar na Stadion Frans Figaroa. E score final di e wega tabata 4-2 na fabor di e seleccion venezolano. E prome gol a cai den e 16 minuut di e prome tempo pa medio di Yohandry Orozco y na e minuut 31 e di dos gol a wordo anota pa Grenddy Perozo, cerando e score di e prome tempo na 2 gol pa nada na fabor di e oncena venezolano.
Den e di dos etapa di e wega, e medio-campista Carlos Fernández a anota e di 3 gol na e 59 minuut di e wega y na e di 73 minuut di e wega, e atacante Richard Blanco a score e di 4 gol pa Venezuela.
Den e delaster minuutnan prome cu wega mester a finaliza, referee a sanciona un hugada bruto na fabor di e Team di Britannia, un Penalty cu a wordo cobra pa e hungador Gragory Lake mandando un tiro imparabel pa e portero venezolano logrando asina e gol di Honor pa Aruba, y na e minuut 79, Chando de Lange a manda un pase perfecto pa Sebastian Montoya kende a kop e bala pa di e forma aki anota e di dos gol na fabor di Britannia.
Sin duda nos mester duna un fuerte elogio na e team di Britannia cu apesar di a enfrenta un team profesional, a sa di duna un bataya tremendo, tambe na e demas hungadornan di e Seleccion di Aruba.Ariba e combinacion di potret por aprecia algun imagen di e encuentro aki.
