Home General Separacion Di Fondo Di Turismo Ta E Mehor Paso Cu Gobierno Por...

Separacion Di Fondo Di Turismo Ta E Mehor Paso Cu Gobierno Por A Duna!

2
0
SHARE
- Advertisement -

Segun Minister Otmar Oduber:

OTMAR ODUBER (3)ORANJESTAD (AAN) — Den e rueda di prensa semanal di gobierno, cu manera custumber a tuma lugar dialuna, tabata presente y a hiba palabra Minister di Finanzanan, Energia y Utilidad, Ing. Mike de Meza; Minister di Turismo y Labor sr. Otmar Oduber, y Minister di Salubridad Publico y Deporte dr. Richard Visser.

Minister Otmar Oduber a cuminza pa bolbe referi na e reunion cu tabata tin den Parlamento siman pasa, encuanto e aumento di e asina yama “room tax” cu hunto cu e 2% cu miembronan di AHATA ta aporta, lo forma un fondo di turismo independiente di e caha central di entradanan di gobierno, cual ley a pasa siman pasa den Parlamento, apesar cu MEP a vota contra.

E titular a bisa cu na un forma habri e ta gradici Gabinete Mike Eman, Prome Minister Mike Eman y Minister di Finanzanan Mike de Meza, cu durante di e reunion publico den Staten, nan a tuma un curashi berdadero y un vision y maneho nobo riba tereno di finanzanan pa por tuma e decision, cu ta e intencion den e parti final di e trayecto cu gobierno a inicia cu aumento di 1.5% riba “room tax”

E dignatario a bisa cu dia 1 di Juni, ora cu e landsverordening tin cu wordo entrega, pa loke ta trata e fondonan cu lo ser destina pa maneho di tanto e mercadeo como mehoracion di e calidad di producto Aruba, e “room tax” lo bolbe aumenta cu 2%.

Esaki, e dignatario a bolbe splica, ta e 2% cu AHATA tabata cobra den pasado y cu aworaki lo wordo incorpora pa hacie 9.5%.

Minister Oduber a bisa cu esaki ta forma parti di un vision sumamente importante, cu durante añanan largo a purba di yega na dje, pa motibo cu e ta kita cierto competencia di e forma con Minister di Finanzanan tin pa opera loke ta concerni e fondonan general, anteriormente te cu e momentonan aki y cu lo continua te cu fin di Juli.

Esaki ta nifica cu e placa cu ta wordo cobra di “room tax” ta bay den un fondo comun general, y di eynan e minister di finanza hunto cu su coleganan ta delinea un maneho pa e destinacion di e placa.

Awor ta bin un cambio, y e mandatario a splica cu e diferencia ta bay ta cu mirando e importancia cu Gabinete Mike Eman ta duna tambe na e industria di turismo, considerando cu e ta nos pilar economico y no pa casualidad 70% di nos economia ta draai di turismo (kiermen si nos turismo no ta bay bon, e entradanan pa salubridad, educacion, seguridad, etc., ni un ta “in place”) gobierno a mira e necesidad pa e fondonan tey disponible na tur momento.

E dignatario a reitera locual el a bisa den Parlamento, cu no ta tur gobierno tin e suerte cu gobierno di MEP a carga, di tin un Plant NV a base di un maneho cu gobierno di AVP a hiba, na añanan 1985 pa 1986, cu por a cobra dos miyon dollar adicional pa hinca den turismo.

E dignatario a señala cu e gobierno na mando ta asegura e fondonan aworaki, atravez di e cambionan cu ta tumando lugar.

Minister Oduber a subraya cu e ta haya straño cu Partido MEP a vota contra e ley aki, siendo cu e intencion den pasado na 2007, gobierno di MEP a bin cu e intencion di pasa un ley pa aumenta “room tax”, cu e unico excepcion e tempo ey, cu nan kier a cobra localnan, kiermen tur Arubiano cu lo kier a keda den hotel, lo mester a paga “room tax” tambe y esey lo a bira di 0% pa 6%.

Pesey e dignatario ta haya straño cu awor un di argumentonan cu oposicion ta uza ta cu esaki ta un medida, siendo cu e ta un ahuste cu ta bay directamente den e mercadeo di Pais Aruba, pa e turista cu ta bishita nos pais, mientras cu gobierno actual a kita 1.5% BBO cu si tabata un medida.

Tambe el a trece dilanti cu e pensamento di gobierno anterior ora di a introduci e BBO tabata cu 50% di dje ta e turista ta paga y na momento cu a haci un calculacion di e 1.5% cu a ser kita, for di 1 Januari 2010, lo a genera 80 miyon pa caha di gobierno, esey ta nifica segun e punto di bista di MEP, cu 40 miyon lo mester a bin for di turismo. Y e aumento di 1.5% ta nifica 9 miyon, pues ta increible pa gobierno compronde cu fraccion di MEP ta vota contra e ley, pasobra nan ta purba argumenta cu ta un medida e ta, siendo esaki tabata directamente pa e turista.

E mandatario a enfatiza cu si e ley cu MEP a propone lo a pasa, e lo a nifica cu e 120 mil hende biba na Aruba lo kier a keda den un resort akinan, lo a paga un aumento di 6% na “room tax”, contrario na loke ta awor cu gobierno di AVP a propone, y cu a pasa den Parlamento siman pasa.

E dignatario ta lamenta cu pa motibo di politica, e fraccion di MEP a keda sin duna sosten na un cambio di ley asina importante y cu nan mes den gobernacion a yega di boga pe durante añanan.

Gobierno actual ta hopi satisfecho y nan a hiba un dialogo hopi estrecho for di December te cu na final di Maart cu nan a yega na e memorandum di entendimento cu AHATA, cu ta esun responsable pa e cobramento cu mester tuma lugar na su miembronan. Tabata tin un excepcion, e dignatario a bolbe splica cu ta RIU, cu no tabata paga e 2% na AHATA, pero cu den conversacion cu e mandatario a tene cu e representante di Spaña, cu tabata na Aruba, el a mustre riba e hecho aki y nan a compronde tambe e necesidad cu tin den e mundo globaliza y di retonan grandi cu tin aworaki, cu ta importante pa nos industria di turismo tin un fondo di mercado y nan ta sostene esaki tambe.

E mandatario a bolbe gradici Gabinete Mike Eman y muy particularmente Minister di Finanzanan, pa nan confianza y cu awor tin un fondo di turismo independiente di e fondo central di caha di gobierno, locual tabata algo cu tanto e gobierno di AVP mes den pasado y esun di MEP tabata tin temor di haci. Segun e dignatario, esaki ta e mehor paso cu por a wordo tuma pa loke ta trata nos industria di turismo.

- Advertisement -

DUNA COMENTARIO

Please enter your comment!
Please enter your name here