Tur e markthallen y kioskeronan lo keda cu nan derecho riba waf
Minister Benny Sevinger:
Gobierno simplemente lo drecha e lugar y organiz’e!!
ORANJESTAD (AAN): DIARIO tin entendi cu tin un stichting “Rancho” cu a worde lanta pa defende interes di e piscadornan di e area di Rancho. Minister Benny Sevinger a duna di conoce den entrevista cu DIARIO cu e ta desea e fundacion aki tur clase di exito. A señala cu e fundacion aki lo mira no solamente pa e piscadornan di Rancho pero tambe pa loke ta trata e parti cultural, di infrastructura, convivencia den e bario.
Gobierno a haya invitacion pa dialuna awor pa asisti na un presentacion. E ta kere cu esey ta e caminda cu barionan tin cu cana. Uni, lanta un fundacion y mira pa e porvenir di e barionan, a bisa.
Gobierno tey pa defende accionnan cu e piscadornan tuma, e enfatiza. “Conta cu mi como un legitimo ranchero den unda cu mi por yuda, cu nos lo tey pa yuda”. Papiando di waf chikito a puntra e mandatario mesora kico nan intencion ta como gobierno pa cu e kioskonan riba waf.
El a laga sa cu e parti aki ta bay wordo drecha.
Na e momento aki tin dos opcion riba mesa, a bisa. Un ta cu un fundacion nobo ta bay tuma over pa drecha y atende cu e huur cu hendenan tin cu bay paga of esaki lo bay wordo poni na man di APA cu lo ta esun cu lo bay tuma over e teritorio y traha e desaroyo nobo y yega na un contract cu tur cu ta eyriba, a expresa.
Tur hende cu ta eyriba, pa no tin malcomprondemento, tur e markthallen y e kioskeronan cu tey ta keda cu nan derecho. Gobierno simplemente lo drecha e lugar, organize y bin cu un maneho unda cu nan por bende mas. Turista y local lo por yega den un area dib artesania cu por wordo usa pa promove Aruba y cumpra un regalo pa hiba bek na nan pais, a splica.
Esey ta e intencion y gobierno ta trahando riba dje. Den corto plazo lo presenta e mapanan pa e construccion cuminza, e mandatario a señala.
