Home General Un Dia Farandulero Na Aruba 75 Aña Pasa

Un Dia Farandulero Na Aruba 75 Aña Pasa

45
1
SHARE
- Advertisement -

gardel-aruba-28-mayo-1935Aruba 28 di mei 1935

Awendia debi na nos industria di turismo nos por aprecia aki hopi show di artistanan internacional cu na hopi parti di mundo o ciudad cu hopi mas habitante cu Aruba shownan asina no ta yega.

   Tin hiaha nos ta puntra nos mes si e fenomeno aki ta semper ta asina o ta algo di ultimo decadanan ?

   Un hecho farandulero cu sigur a marca historia y a keda graba den memoria di hopi di nos grandinan ta e bishita di e astro di Tango Argentino Carlos Cardel. Tambe algo cu Carlos Gardel a haci pa promer biaha den su bida na Aruba a cambia rumbo di su bida a un manera dramatico y kizas di e musica di Tango pa semper.

   Carlos Gardel y e musica Tango:  Carlos Gardel a nace como yiu no reconoci y a worde batiza cu nomber Charles Romuald Gardes probablemente na Touluuse Francia na 11 di December 1887, mester bisa si cu e tabata ta tin un otro partida di nacemento cu ta indica 1890 na Uruguay, probablemente esun di Uruguay ta falsifica pa asina e evita di worde yama pa sirbi den ejercito Frances durante primera Guerra Mundial. Carlos mes ta bisa semper cu e a nace na Buenos Aires Argentina na edad di 2 aña y mei y asina evadi e discussion ey !

   Gardel su bida artistico a cuminsa na 1910 y te awe ta worde considera como e creador di musica di Tango na 1917 cu e vocalizacion di e cantica Pascual Cuntursi y Samuel cantica “Mi noche Triste” e disco aki a bende 100.000 exemplar cu at e epoca ey tabata un exito tremendo; e tawta un Hit den ful Latino America. Na aña 1928 Gardel a bende 70.000 disco den 3 luna na Paris ! Tambe Gardel a graba diferente cancion di tango cu a bira inmortal manera “mi Buenos Aires Querido, Cuesta abajo, Amores de studiante, Volver y El dia que me Quieras. Pa evita confundi mester distingui e Volver Tango cu e famoso refran “20 anos no es nada” y e Volver ranchera cu su refran “y volver volver volver”

   Tambe Carlos Gardel a actua den diferente cine filma na Paris, Hollywood y New York p.e. El dia que me quieras y Tango bar. Mester tene cuenta cu den e epoca aki no tabata tin casi telefoon, ni internet, ni fax ni television. Audio tabata worde graba e tempo ey ariba disco di 78, 45 of 33 rpm y esakinan tabata worde toca ariba vitrola (toca disco) tambe disco y vitrola tabata hopi caro no at tur hende por a cumpra uno. Radio difucion e tempo ey tabata masha poco, Aruba no tabata tin radio ya cu te 20 aña despues na 1954 Radio Kelkboom a cuminsa su transmission.

  E tempo nan aya Aruba tabata scucha radio di Venezuela (desde 1926 tin radio, Radio Caracas), di Curaçao, Cuba y Santo Domingo. Mester apunta cu e tempo ey ainda tecnologia di “transistor” no a worde inventa y e radionan at traha cu “tupe” cu mester keita promer cu e radio por traha. Propaganda of otro noticia inportante tabata worde haci door di core cu auto cu Speaker (bosina) aribanan den pueblo pa anuncia un ke otro.

   Carlos Gardel yega Aruba procedente di Maracaibo cu barco dia 28 di mei 1935 y a haci un recorido den cayanan di Oranjestad. Un multitud bastande grandi di hende a bay pa salude. Tambe e a hospeda na un Hotel situa na Wilhelminastraat # 67 cu ta yama “Hotel Palacio e hotel tabata pertenece na sr. Boy Debrot’ sr. Debrot tabata un comerciante grandi e tempo ey. Hotel palacio ta keda dilanti di caminda awendia tin e famoso restaurant Argentino “El Gaucho”. Pa bay sigui su Gira na Curaçao Carlos Gardel a dicidi di tuma un avion, esaki a haci cu Carlos Gardel pa promer biaha den su bida a viaha cu avion ariba e ruta Aruba- Curacao. Carlos a bay den e Fokker tri-moter “Snip” cu algun luna anterior a habri e ruta aki pa KLM.E motibo cu Carlos no a bula nunca den avion ta pasobra e tabata tin hopi miedo di avion por bisa te hasta panico di bula cu avion. Lamentable su panico tabata su proteccion.

   Gardel a trece musica popular Aruba:  Cu gardel musica popular a drenta Aruba, ja cu anteriormente aruba su musica tabata worde domina pa musica folclore clasico manera waltz, mazurca, polca cu a worde treci door di e promer habitantenan di continente bieu y despues  a sigui nace tumba y tambour di influencia Afro-Indio Caribense. Tango tabata un musica y baile hopi mas sensual cu Aruba tabata conoce pero el a bira un sensacion. Hopi hende na Aruba a cuminsa canta tango y tambe cana cu e sombre “a medio lado” (di un banda) manera Gardel tambe, te hasta sombre a caba den tur tienda na Aruba e tempo ey. Agrupacion di joven lanta uno hopi popular tabata “Los Trobadores Tropicales” cu integrante manera (si mi ta informa bon) Clemente Lacle, Shon Fi Booi, Sjemi Coronel Jan Croes (di SN) y Harold Hopman. Tambe sr. Tali Lopez tambe tabata canta Tango mescos Gardel. Gardel a duna su presentacion den Teatro Gloria cu tabata situa den Steenweg. tambe un bar a haya nomber di “Tango Bar” e tabata situa unda awor ta Masifral. tango a keda popular te fin di añanan ’40 na Aruba.Despues musica ranchera a bira popular

   Di Curaçao Gardel a bay cu barco Barranquilla pa sigui cu su gira den Colombia, despues e a bay Bogota cu avion y de eynan pa sigui su via e avion abay di transito Medellin saliendo di Medellin dia 24 di Juni 1935 e avion “Ford F 31 tri-moter” slip bay dal den un otro avion ariba e pista di aterizaje.Gardel a muri carboniza hunto cu un gran parti di su acompañantenan y e leyenda di Tango a nace.

  Tambe mi ta gradici sr. Frans Croes (92)cu a dunami algun informacion como un persona cu tabata presente na e show di Gardel 75 aña pasa como joven di 17 aña.

Si mi por a lubida of bruha algun hende of hecho mi disculpa. Importante ta pa nos historia no bay perdi !

 Colaboracion di Ramsay Acosta.

- Advertisement -

1 COMMENT

  1. Bunita relato. Interesante pa lesa con farandula tbt e temponan aya. Bon idea pa sigi cu mas y cu nos artistanan local tambe, con nan a cuminsa, ken a stimulanan, nan prome presentacion enz.

DUNA COMENTARIO

Please enter your comment!
Please enter your name here