Home General 600 Miyon Florin Mas Lo Lora Atrobe Den Aruba Su Economia Pa...

600 Miyon Florin Mas Lo Lora Atrobe Den Aruba Su Economia Pa Aña

0
0
SHARE
- Advertisement -

Creando bon boluntad y cu comunicacion efectivo Gobierno ta salba 12 porciento di GDP

ORANJESTAD (AAN): Ademas di un suma di 211 miyon Florin cu Valero ta pagando Pais Aruba como parti di e “Settlement Agreement” anuncia siman pasa, Valero of cualkier otro compania of companianan cu opera e refineria na Sero Colorado mester contribui cu 7% di impuesto ariba ganashi, mara na un minimo di 18 miyon Florin anualmente na e caha di nos isla. Di un “tax holiday” cu e refineria tabata disfruta di dje antes, awor e ta pasa pa contribui pa prome biaha den e entradanan di Pais pa su actividadnan economico.

    Despues di presenta e “Settlement Agreement”, ehecutivonan di e multi-nacional petrolero a biaha pa nos isla y diahuebs ultimo a anuncia cu Valero Aruba Refinery lo ta operacional atrobe den 90 dia. E convenio cu a habri porta pa reapertura aki a worde aproba den Parlamento diadomingo 30 di mei den oranan di madruga cu un mayoria di voto, incluyendo di e fraccion completo di AVP di 12 parlamentario y fraccion di Partido Democracia Real su parlamentario.

    Cu e reapertura di e refineria 12% di e economia di nos isla a worde salba, representa pa e promedio anual di 600 miyon Florin cu Valero ta yuda lora den nos economia via salarionan, compra di productonan pa uso den e refineria, huur di equipo y auto, servicio y otro gastonan.

    Un di e impactonan mas grandi cu e reapertura di e refineria tin ariba e economia di Aruba ta cu adicional di e 600 empleadonan cu ta keda den empleo directo di Valero Aruba Refinery, mas o menos 5000 hende lo worde emplea atrobe via contratista pa cuminsa un turnaround completo di e planta. E preparacion di e refineria pa cuminsa operacion atrobe ta inclui un inversion di 50 miyon dollar Americano.

    No solamente e poder di compra di 5000 pa 7000 habitante di Aruba ta worde restablece, pero naturalmente tambe e pagonan di entre otro impuesto ariba salario, AZV y AOV na un total di 120 miyon Florin lo ta na vigor atrobe.

    Un otro meta yega den e “Settlement Agreement” tabata pa establece claridad completo concerniendo entre otro e terenonan erfpacht cu e refineria ta construi ariba. Den e areglo di tereno tambe a worde inclui e tereno di erfpacht na waf di Oranjestad unda e dos tankinan ta ubica, cu a worde entrega back na Pais Aruba y awor por worde usa pa proyecto di embeyecimento cu tin di haci cu actividadnan den nos haf.

   E actitud di Gabinete Mike Eman cu for di un principio tabata positivo y cooperativo, cu un determinacion grandi pa negosha y dialoga cu mente habri y cu tur opcionnan ariba mesa a crea un ambiente di claridad y un determinacion grandi pa salba un parti importante di economia di Aruba.

    E actitud aki mes a resulta cu e refineria a demostra su bon boluntad pa duna gobierno tempo pa bin cu un proposicion y manteniendo nan empleadonan directo na trabao y paga nan salario completo na un total di 80 miyon Florin durante 10 luna sin cu e refineria tabatin ningun entrada despues cu a “shutdown” e planta.

    Mr Mike Eman, Prome Minister y Minister di Asuntonan General y ing Mike de Meza, Minister di Finanza, Comunicacion, Utilidad y Energia y nan ekipo a worde elogia pa ehecutivonan di Valero di ta personanan razonable cu ta traha cu transparencia y amor pa Aruba, pa un biaha mas ofrece trabao y entrada pa miles di famia riba nos isla.

- Advertisement -

DUNA COMENTARIO

Please enter your comment!
Please enter your name here