Home General Agenda Di Biahamento Di Parlamento Ta Strobando Gobernacion

Agenda Di Biahamento Di Parlamento Ta Strobando Gobernacion

4
0
SHARE
- Advertisement -

Gobierno ta casi paralisa debi na presupuesto

Den biahe si parlamento ta mas uni cu nunca

front_03ORANJESTAD(AAN): Diamars atardi Parlamento a caba cu tratamento di presupuesto di Turismo, Labor y Transporte di Minister Otmar Oduber.  No tabata por otro tampoco, Parlamentarionan a haya nan ta trata e presupuesto den “cinco speed”, pasobra ya awe Diaranzon un delegacion di Parlamento di Aruba ta saliendo pa reunionnan di Parlatino.

   Cu e biahe aki awor, e reunionnan di presupuesto no por sigui te cu otro siman. E siguiente Minister na turno pa defende su maneho y su presupuesto ta Minister Michelle Winklaar di Asuntonan Economico, Asuntonan Social y Cultura. Despues di dje tin 4 otro Minister cu lo mester presenta den Parlamento pa trata nan presupuesto.

    Pero e agenda di Parlamento no ta permiti tanto presion asina, pasobra awe un delegacion ta sali pa Republica Dominicana, otro siman un otro delegacion ta bay Panama y despues un otro delegacion atrobe pa Hulanda. Y den e proceso Parlamento lo baha cu reces (vakantie) tambe cu ta cay casi mescos cu vakantie di school.

   DIARIO a haya sa, cu di banda di e Ministernan ta sinti cu Parlamento no ta duna e prioridad necesario na nan presupuestonan, specialmente cu Gobierno na dado momento tabata casi paraliza pa motibo cu no por tuma decisionnan wardando tratamento di presupuesto.

   E Ministernan ta insisti cu no por tuma falta den e tardanza debi na cambio di gobierno y cambio di e carteranan loke a haci e proceso un poco mas complica.  E parlamentarionan di otro banda ta boga pa e espacio necesario pa por trata un ley. Pa yama un reunion por ehempel nan ta insisti riba 4 dia di anticipacion y pa trata un ley nan mester di mucho mas tempo pa por studia e ley, haci pregunta, busca conseho, etc. Parlamento kier tin su independencia politico pa por controla Gobierno debidamente, sin cu mester trata leynan bou di presion di tempo. Pero di otro banda Gobierno ta sigura cu nan ta confrontando retonan grandi pa e pais aki cu ta rekeri cu Ministernan tin pa traha di mainta te anochi, incluyendo weekend, pa por keda cla cu tur e trabaonan pendiente.

    Nan ta spera di por conta cu e mesun sosten y e mesun dinamismo di parti di Parlamento tambe. Si Ministernan ta traha di dia y anochi riba leynan nobo pa mehora calidad di bida di e pueblo pero ora e yega Parlamento mester warda simannan largo prome cu trata e leynan, anto e no tin sentido.

   Contal cu awor por ehempel tin un ley pa haci cambio drastico den turismo, unda lo privatiza e fondonan di ATA pa asina hunto cu AHATA yega na un presupuesto conhunto pa yuda mercadea nos isla mihor y drecha e producto Aruba.

   Un logro cu den e ultimo 12 añanan ningun Minister di turismo no por a keda cla cune. Sinembargo na Parlamento awor e proceso ta stanca, pasobra e Parlamentarionan mester di mas tempo.

   E ta lanta interogatorio den comunidad si reunionnan di Parlatino por ta asina importante cu nos ta opta pa no trata presupuesto y no trata un ley importante di turismo, pero di otro banda ta duna prioridad na biahenan cu nunca mas ta tende kico a logra despues cu e delegacion yega back for di nan “trip”.

 

Parlamento ultimo dianan ta papia hopi di renobacion di politica, kizas e biahenan aki pa paisnan Latino por bira un topico di discusion interno ora di auto-critica nan maneho, combina cu nan propio presupuesto di biahamento rond mundo.

 

- Advertisement -

DUNA COMENTARIO

Please enter your comment!
Please enter your name here