Home Politica Analisis politico…. Grandi pero hopi grandi!

Analisis politico…. Grandi pero hopi grandi!

0
2
SHARE
- Advertisement -

Ta dificil pa describi e logro di e gobierno di Mike Eman den palabranan comun y coriente. Grandi pero grandi mes pa nos pueblo y nos isla cu e gobernantenan a logra di crea e ambiente y e circumstancianan cu a conduci na e reapertura di nos refineria. Ayera mainta ministro presidente Mike Eman a splica en detaye con e proceso a bay y pa kende cu a scuche mester ta bisto cu tabatin un inteligencia y determinacion grandi tras di e planeamento y actuacion pa por a yega na e acuerdo cu Valero pa habri e planta back. Manera Mike a splica a cuminza pa pone un base di confianza cu tabata necesario pa por dialoga respetuosamente cu Valero. E gobierno di Nel Oduber a laga atras un impresion malisimo y negativo. Di banda di Valero tabatin un desconfianza total mirando e trato cu nan a haya di e gobierno di Nel Oduber.

Ora cu e dirigentenan di Valero a ripara e honestidad di e gobernantenan di Aruba di awe e ambiente poco poco a cambia. Nan a mira cu di berdad un team nobo a tuma over y cu e team aki ta dispuesto pa haci loke ta necesario pa yega na un reapertura pa sigura esnan cu a perde nan trabao haya esaki back.

E dirigentenan di Valero a mira con serio e gobernantenan aki tabata pa sinta hunto cu Valero y mira unda na mundo lo por haya interesadonan cu lo por scapa e refineria. Nan a mira cu e gobernantenan a envolvi gobierno di Hulanda pa para banda di nan pa pone mas forza tras di e deseo di Aruba pa no laga e planta bay perdi pa semper.

Tambe e dirigentenan di Valero a mira cu seriamente e gobierno nobo lo kita e BBO cu tabata e factor final cu a pone Valero cera e refineria. Valero a mira cu e gobierno di Aruba lo pone hechonan tras di nan palabranan.

Esaki a sosode e fin di siman pasa ora cu den parlamento di Aruba 13 miembro di Staten a vota pa e acuerdo entre gobierno y Valero. Esaki tabata e punto final cu a pone Valero dicidi di habri e planta atrobe. Cumpli awo tabata e palabranan cu Nel Oduber a usa despues cu pueblo a manda e y su gobierno cas malamente.

Algun di su fanaticonan a keda grita esaki y hasta a pone sticker cu e texto aki ariba nan auto. Den e mesun ambiente aki e miembronan di MEP a vota contra e acuerdo cu gobierno tabatin cu Valero.

Esaki lo keda ariba nan consenshi pa resto di nan bida. E ta ilustra si e mentalidad maligno cu ta biba den nan. Mike Eman y su colega ministronan sosteni door di 13 miembronan di Staten, 12 di AVP hunto cu Andin Bikker cu a mira importancia di e acuerdo aki. Den un corto tempo e resultado di e gobierno o bao di Mike Eman a mustra un capacidad unico y den menos cu seis luna a drecha e relacion cu Hulanda y e otro partnernan den Reino.

Awe Aruba ta un parti di Reino Hulandes respeta atrobe manera e mester ta. Den menos cu seis luna di gobernacion KLM ta bulando pa Aruba atrobe. KLM semper tabata un orguyo pa henter nos pueblo cu a bay for di Aruba pa motibo di e gobernacion maligno di MEP y Nel Oduber.

Carnival Cruises ta back na Aruba. Nan a bay pa e mesun motibo di un gobierno cu no tabatin e interes di nos hendenan na pecho y cu no a preocupa cu e compania cruisero aki a bay laga nos isla. Cu e reapertura di nos refineria e gobierno di AVP a mustra cu si tin e voluntad y capacidad nos por logra cosnan grandi pa nos pais.

Den esaki e gobernantenan di MEP lo bay den histroria como politiconan cu a concentra completamente ariba nan mes y esnan cerca di nan. Den menos cu seis luna e gobierno di Mike Eman a destaca y a mustra mundo kico por ora hende tin e inteligencia, idealnan, determinacion y e stimacion pa pueblo.

Ya caba e team di AVP a marca historia y e exito aki lo duna e team di Mike Eman e forza y inspiracion pa sigui cu cosnan grandi pa nos pueblo.

- Advertisement -

2 COMMENTS

  1. ku tur e logro grandi aki ku gabinet Eman a mustra na pueblo ku na determination y amor di aruba ami ta kere otro election no mester tin laga e gobierno aki ku tin pais aruba den su curason sigui traha pasina hiba nos duchi aruba dilanti nan ta traha pa e pueblo y ku e pueblo ayooooo friends and family wega a kaba danki na su excelencia Mike y su team

  2. Pabien de Aruba !!!!,,, Gran logro de un gocierno que si quiere lo mejor para su pueblo y la economia en general
    Demostraron coraje, entereza y responsabilidad,,,,, y demostraron tambien,, que los que votaron en contra estan en contra de la razon y del sustento de los trabajadore
    Bravo por el gobierno que pondra el nombre de Aruba en alto

DUNA COMENTARIO

Please enter your comment!
Please enter your name here