Home General Apertura Oficial Di Sala Di Exposicion Di U.N.O.C.A.

Apertura Oficial Di Sala Di Exposicion Di U.N.O.C.A.

0
0
SHARE
- Advertisement -

Cu coleccion di STICUSA y di U.N.O.C.A. 

ORANJESTAD(AAN)– Union di Organisacionnan Cultural Arubano (UNOCA) cu hopi orguyo ta anuncia cu dia 1 di Juli 2010 lo tuma lugar e apertura oficial di su sala di exposicion.

Pa prome biaha den historia di Aruba lo exhibi pa publico e “Coleccion STICUSA”.

E coleccion aki ta consisti di obranan di artistanan local cu STICUSA a adkeri durante su existencia (1950 – 1990).

Na aña 2008 Gobierno di Aruba a pasa e responsabilidad pa cu e coleccion aki na UNOCA bou di e condicion cu UNOCA mester percura pa un sala di exposicion permanente.

Awor cu e sala di exposicion di UNOCA a bira un realidad, comunidad di Aruba ta haya e oportunidad pa admira dicho coleccion.

Tambe lo ta bai tin oportunidad pa admira parti di e “Coleccion UNOCA” cu ta consisti di obranan di artistanan local cu UNOCA a adkeri atraves di tempo.  

Metanan principal di UNOCA pa bini cu exposicion di “Coleccion STICUSA” y ‘Coleccion UNOCA” ta pa salvaguardia y conserva nos herencia cultural y haci’e accesibel pa henter comunidad di Aruba y tambe pa tur hende cu tin interes den cultura di Aruba.

Teniendo na cuenta e balor histórico y cultural di e exposicion aki y haciendo e exposicion accesibel pa tur hende, ta spera cu lo logra contribui na concientisa mas y mas hende riba e importancia di cultura pa Aruba y e rol sumamente importante cu nos artistanan local ta hunga den henter e desaroyo cultural di Aruba. 

UNOCA ta spera cu mas hende, principalmente hobennan wordo inspira y cu nan creatividad artístico por sigui florece.

Tambe UNOCA ta spera cu e exposicion aki contribui cu mas hende duna balor na arte di nos artistanan local y pa hunto conserva nos herencia cultural pa futuro, dunando e awor e balor cu e merece.

Den otro relatonan lo elabora mas riba e.o.: historia di STICUSA,  “Coleccion STICUSA” y “Coleccion UNOCA”.

Entrante 2 di Juli tur hende ta keda cordialmente invita pa pasa admira e balioso exposicion aki. Pa mas informacion por tuma contacto cu oficina di UNOCA durante oranan di oficina, na su adres nobo na stadionweg 21 of na number telefon 583-5681.

 

- Advertisement -

DUNA COMENTARIO

Please enter your comment!
Please enter your name here