Consulta Tocante Piscamento cu Canasta
ORANJESTAD (AAN); Durante e ultimo simannan tabata tin hopi discusion tocante piscamento. Particularmente e topico di pisca cu canasta a lanta hopi intercambio y asta discusion. Awe diaranson 9 di juni pa 8’or di anochi na Club Caiquetio na Paradera, Departamento di Agricultura, Cria y Pesca (LVV) of miho conoci como Santa Rosa, ta invita pueblo asisti na un dialogo cu piscadonan di Aruba.
E organizadornan di e anochi di consulta ta conciente cu e topico di canasta ta uno controversial den nos comunidad di piscado, pero na mes momento ta convenci tambe cu ta solamente mediante dialogo y a base di argumentonan nos por siña compronde otro mihor. Hecho ta cu dialogo habri y sincero ta un vehiculo importante pa fortifica union entre nos piscadonan.
Pesey mes e organizadornan ta conta y confia cu e anochi lo bay den un bon ambiente y lo contribui na e union tan anhela.
INVITACION: Pa medio di esaki ta invita tur piscado y publico en general pa un interesante dialogo na e consulta cu piscado. Ta asina cu Minister encarga cu pesca, sr. Otmar Oduber, den cuadro di su maneho pa envolvi comunidad prome cu tuma decision, a pidi Departamento di Agricultura, Cria y Pesca pa den cooperacion cu Fundacion Centro di Pesca Hadicurari, scucha opinion di piscadonan di Aruba encuanto e topico di canasta.
LEY Y PETICION: Ley ta prohibi piscamento di canasta sin permiso. Desde 1999 departamento di pesca a mantene un maneho cu no ta encurasha piscamento comercial segun defini den e ordenansa di pisca AB 1992 no. 116, art. 2, door di NO duna permiso pa pesca comercial cu canasta. Na 2002 a haci un prueba dunando un permiso limita pa mira e posibilidadnan. Despues a kita e permiso como cu tabata tin hopi molester pa y keho di e piscadonan local, ademas cu a keda demostra cu no a atene na e condicionnan stipula den e permiso. Desde 2005 no tabata tin piscamento legal cu canasta mas. Recientemente Minister Otmar Oduber a ricibi varios peticion pa haya permiso pa pisca cu canasta.
ENVOLVIMENTO DI COMUNIDAD: Den cuadro di e maneho di Minister Otmar Oduber pa envolvi comunidad prome cu tuma decision y pa haya un mihor bista di e opinion y sentimentonan di comunidad di piscado entorno e topico, ta organiza un anochi di dialogo y consulta na unda lo scucha opinion di tur presente riba e argumentonan pro y contra dunamento di permiso pa piscamento cu canasta. Publico presente lo haya varios informacion y lo tin oportunidad di expresa nan argumentonan.
Na final di e anochi lo tin un mihor bista di e opinion general di comunidad di piscado y lo compila e informacion y deseonan di esnan presente den un raportahe y conseho na e Minister concerni. Teophilo “Tilo” Damian, director di Departamento di Agricultura, Cria y Pesca lo ta e moderador cu lo guia e anochi. E consulta ta programa pa tuma lugar na Club Caiquetio na Paradera, cuminsando pa 8’or di anochi, diaranson 9 di juni 2010. Pa cualkier informacion adicional por tuma contacto cu sr. Damian na Santa Rosa.
