Home General Dia di Independencia Filipino Diasabra awor

Dia di Independencia Filipino Diasabra awor

6
0
SHARE
- Advertisement -

ORANJESTAD (AAN): Manera tur e ultimo 8 aña nan, Diasabra awor dia 12 di Juni, e comunidad Filipino akinan na Aruba lo festeha nan di 112 aña di Independencia. Nos ta masha orguyuso y hopi agradicido na e gobierno y tur e otro autoridad nan di Aruba cu tur e aña nan aki semper ta reconoce y ta acompanja nos cu e celebracion aki.

   Segun Consul Ami O. Henriquez-Mendez, e aña aki, lo tin atrobe e bishita oficial di nos Embahadora na Caracas, señora Jocelyn Batoon Garcia. Aruba ta e poco paisnan fuera di nos pais Filipinas cu ta celebra e dia aki cu su parti protocolair manera nos ta haciele semper akinan. Nos comunidad Filipino aki na Aruba y nos gobierno saliente na Manila bou di Presidente Señora Gloria Macapagal Arroyo ta hopi agradicido pa esaki. Tur aña sra Ami Henriquez Mendez, Consul Honoraria na Aruba conhuntamente cu su conseheronan ta escohe un grupo di Filipinos cu ta destaca den e comunidad na Aruba.

    Ultimo aña tabata e grupo di varios  studiantes y e aña aki nos kier pone enfasis ariba e pionero nan Filipino cu a yega Aruba durante 1980 – 1988 y a habri caminda pa tur otro nan cu a yega después di nan aki na Aruba.

E comunidad Filipino a yega Aruba desde 1981, den personanan di Señora Amparo Latham-Regana, Señora Helen de Cuba-Garcia q.e.p.d y e  Consul Honorario, Señora Ami Henriquez Mendez. Despues a yega Pastor Felix Pasadilla di Santa Cruz q.e.p.d y tres luna después tabata su ruman morocho, Pastor Nick Pasadilla cu a stationa na Paradera. Fin di 1983 a yega Lloyd Mathani y después a bin for di Curaçao Pastor Rene Villamora cu a tuma over Savaneta. Despues a bin e grupo di familia Antioquia, Policarpio, Tobias, Flores, Villaran, Sedoriosa cu a bin traha aki na Aruba.

   Esakinan tabata considera e pioneronan cu a bin Aruba esta un grupo di menos di 20 Filipino. Tabata después di nan cu a bin na 1989 e grupo grandi pa construi La Cabana, e trahadornan di Hyatt Regency, Holiday Inn, Americana y algún restaurant renombra, manera Tony Romas y The Mill pa menciona algún. Tambe e grupo di Pastor nan tambe a crece durante e aña nan siguiente.

   Di e pioneronan aki casi tur a establece akinan, traha nan hogar akinan. Varios di nan yiu y nieto nan a nace aki na Aruba y hasta mester sinja nan di nos tradición y cultura como nan ta e habitante nobo akinan, esta e Arubiano – Filipino. Esaki ta e muestra di e manera fácil cu e comunidad Filipino a entegra aki na Aruba. Fuera cu nan tur a yega akinan papiando nan idioma y Ingles, nan a sinja papiamento den un tempo relativo hopi cortico.

Manera mi ta bisa tur aña cu rond di mundo, Filipinas a exporta especialista, doctor, nurse, architecto y tur clase di profesional nan. Actualmente nos yiunan ta esun nan cu ta sigui door di ta studia bon akinan y ta bay afor, sea Hulanda, Merca, Canada of Filipinas pa bolbe back como profesional pa yuda aki na Aruba, cual a bira nan cas!! Esaki ta hacimi hopi bon y orgulloso di mi paisano nan. Nan amor pa e patria aki cu a tuma nan mayornan cu man habri. Y nan ta contribui awor na e economía di Aruba.

E aña aki, nos Embahadora lo bini pa topa cu e gobierno nobo y tambe splika e cambio cu na nos país a caba di tuma lugar. Nos gobierno nobo lo tuma e mando na January 2011. Lo tin varios encuentro cu otro gremio na Aruba y lo worde acompanja pa e Consul Honorario na Aruba señora Ami Henriquez Mendez.

Mi kier invita tur mi paisano nan y Aruba en general pa acompanja nos diasabra awor 12 di Juni pa 9:30 am di mainta na Wilhelmina Park pa asina e parti protocolair por cuminsa EXACTAMENTE 10 am. Despues di e parti oficial aki, lo tin oportunidad di tuma un brindis te cu 12:30 na Fort Zoutman.

Pa cualkier pregunta por comunica cu mi persona na e telefoon nan 586-5766 y 748-4955. Mi kier pidi boso nan carinjosamente pa tene cuenta cu e horario di oficina cu ta di Dialuna pa Diabierna di 1pm -6pm. Por favor, yama prome pa un cita como cu no ta tur ora mi ta na kantoor. Gradici tur mi paisano nan cu semper tey pa yuda ora mester di nan y ta desea tur Filipino na Aruba un feliz dia di Independencia di Filipinas.

- Advertisement -

DUNA COMENTARIO

Please enter your comment!
Please enter your name here