Analisis politico
ORANJESTAD (AAN): Un hende mester tin un mentalidad hopi maligno pa e manda un carta abierta pa Richard Gere caminda e ta skirbi cu Richard Gere no mester a ricibi e reconocimento di ministro Otmar Oduber pasobra Otmar tabata bao di investigacion poco tempo pasa. E carta aki no ta solamente un sla duro den cara di un ministro Arubiano honesto pero e ta un ofensa directamente na henter nos pueblo.
Un acto repudiabel atrobe di nos ex pastor Rudy Lampe. E daño haci cu e carta aki cu un presencia grandi di prensa internacional na Aruba ta un bofta den cara di henter nos pueblo y nos isla. Pa haci algo asina bo mente mester ta putri di odio y envidia.
No por tin un hende den Rudy Lampe su propio partido cu por aproba un acto asina repudiabel. Un acto baho cu ta solamente posibel saliendo di un persona completamente frustra. Aruba mester worde libra di figuranan asina. Nan ta causa un daño grandi na nos isla. Ministro Otmar Oduber a worde persigui inhustamente pa hopi aña. Rudy Lampe sa bon bon cu e persecusion aki tabata inhusto y incorecto.
Un cantidad di casonan cu a worde entama contra Otmar tabata solamente pa maldad y e a gana cada bez atrobe. Rudy Lampe sa esaki pero asina mes ta manda un carta asina deningrante pa un artista grandi solamente pa caricia su propio ego. No tin ningun duda den henter nos comunidad cu Otmar Oduber a worde persigui inhustamente.
Nos comunidad y sigur nos medionan di comunicacion mester evalua cu aunke nos conoce un libertad di prensa hopi serio si un mente asina maligno mester haya spacio cada rato pa scupi su sushedad. Un medio di comunicacion cu ta respeta su mes mester por huzga ariba un cierto momento cu e barbaridadnan baho y vil cu ta sali for di Rudy Lampe e ex pastor fracasa ta causa nos comunidad un daño horibel cu no tin hustificacion.
Loke Rudy Lampe a haci cu su carta dirigi na Richard Gere no por carga aprobacion di ningun hende cu ta pensa normal. Si pensa so cuanto hendenan di prensa internacional cu tabata na Aruba cu a haya e carta aki por conclui cu e mente malo aki por tin un punto real ta pone tur Arubiano cu ta stima nos isla maria, bira malo.
Rudy Lampe sigur no ta un sujeto bobo. Alcontrario! Esaki kier meen cu intencionalmente e ta bay keda purba di bin den publicidad cu topiconan negativo pa nos comunidad basta e haya atencion. Di e manera aki e ta bay purba di haya un asiento atrobe den proximo eleccion.
Solamente cu accionnan negativo cu ta causa daño grandi na nos comunidad ta su participacion den politica y su speranza ta cu e lo por ta suficiente negativo pa haya un apoyo pa aki cuatro aña drenta parlamento. Nos no por enfatiza suficiente cu e ex pastor aki hunto cu e dirigentenan di MEP solamente lo concentra e proximo añanan ariba un campaña destructivo sin tene lo minimo cuenta cuanto nan ta tortura nos pueblo y cuanto daño esaki ta haci na nos isla. Aruba tin awe un gobierno cu ta trahando di dia y anochi pa soluciona e problemanan cu MEP y Rudy Lampe a laga atras.
E exito te awe ta hopi impresionante y hustamente esaki ta pone e dirigentenan di MEP y Rudy Lampe bira agresivo y ta ciega pa e consecuencianan di nan actuacion. Nan ta purba di tur manera kibra e gobernantenan cu ta cosechando tanto elogio pa nan bon trabao. Den e dianan aki e diferencia entra e dos corientenan politico na Aruba ta sali mas na cla cu nunca. Un coriente politico cu ta constructivo, positivo, inteligente y idealista pa construi un Aruba caminda tur nos hendenan por biba feliz y satisfecho poni banda di e coriente di MEP y Rudy Lampe cu ta e politiconan destructivo sin consenshi.
