Home General Economia Arubano Ta Manda Señalnan Mixto

Economia Arubano Ta Manda Señalnan Mixto

0
0
SHARE
- Advertisement -

Resumen di e boletin di e di cuater trimester di 2009

ORANJESTAD (AAN): Banco Central di Aruba a conclui den su boletin di e di cuater trimester di 2009 cu Aruba su economia ta sera e aña den un deterioro continuo. Aunke cu tin señalnan di mehoramento for di Merca, Aruba su partner principal, entrada relata na turismo a sigui bao di e nivel di 2008, asina mes cu e cantidad di turista a mehora. Tambe, e ciere temporal di e refineria a afecta negativamente cualkier indicacion di recuperacion.

   Indicadornan di e actividad di construccion riba e isla a mustra un deterioro continuo den e di cuater trimester di 2009, den cual periodo e cantidad di permisonan otorga pa construccion, e balor total di e permisonan otorga pa construccion, e total na peso di cement importa, y e cantidad di instalacionnan electrico aproba a experiencia un bahada significante. E ciere temporal y e futuro insigur di e refineria Valero a sigui tin un impacto negativo den e sector di construccion manera tambe riba empleo y consumo local.

   E margen cu gobierno tin pa por interveni a keda limita door di e aumento di e debe di gobierno y e bahada anticipa den e total na entrada di impuesto asocia na e reduccion di e tasa di impuesto riba benta (BBO) cu na comienso di 2010 a worde reduci, y e actividad economico debil. Espacio pa por manuvra a worde limita mas ainda door di e desaroyonan reciente pa cu e fondo di pensioen di APFA, cual a registra un deficit significante, resultando den gastonan adicional no premira den e presupuesto di gobierno.

   E desaroyo den prijs a mustra un subida den e di cuater trimester di 2009, mientras cu e averahe di e nivel di prijs den e di cuater trimester di 2009 tabata 1.6 porciento mas halto cu e nivel di aña pasa. E inflacion basico (cual ta e indice di prijs di consumo excluyendo energia) a suma na 1.3 porciento, un tiki bou di e tasa di inflacion.

   E cantidad di placa den circulacion a crece cu Afl. 43.2 miyon den e di cuater trimester di 2009 como resultado di un fluho neto di fondonan for di exterior di Afl. 56.4 miyon, cual parcialmente a worde mitiga pa un bahada di Afl. 13.2 miyon den e activo domestico neto. E causa di esaki tabata mas tanto un subida di Afl. 37.0 miyon den e credito neto di e sector bancario na e sector publico, reflehando un aumento den e depositonan bancario di e fondo di desaroyo.

   Di otro banda, credito bancario na e sector priva a expande cu Afl. 15.0 miyon, a causa di un aumento di Afl. 11.2 miyon den hipoteca pa construccion di cas y un aumento di Afl. 4.8 miyon den credito na consumidornan. Creditonan na empresanan a keda practicamente mescos cayendo cu solamente Afl. 0.6 miyon.

E balansa agrega di banconan comercial tabata Afl. 4,406.3 miyon na final di e di cuater trimester di 2009, cual ta Afl. 5.0 miyon (of 0.1 prociento) mas abou cu e nivel registra na final di e trimester anterior. Contrario na esaki, e balansa total di institucionnan financiero no-monetario a crece cu Afl. 119.6 miyon (of 4.6 porciento) te na Afl. 2,713.5 miyon, un resultado di tanto un subida den e debenen riba gobierno como sector priva di e institucionnan aki.

   E margen den e tasa di interes di e banconan comercial riba fianzanan y depositonan nobo a baha te na 7.3 porciento den e di cuater trimester di 2009, compara cu 7.9 prociento den e di tres trimester di 2009. E rason principal di e desaroyo aki ta debi cu e tasa averahe, teniendo cuenta cu su peso, riba e interes duna na prestamonan nobo a baha cu 1.0 punto di porcentahe te na 10.6 porciento. E sistema bancario a sigui mustra nivelnan halto di likides unda cu e tasa di likides tabata 30.1 porciento, hopi mas halto cu e minimo di e rekisito prudencial di 12 porciento.

  E balansa di pago a alcansa un surplus di Afl. 56.4 miyon den e di cuater trimester di 2009, resultando den un fluho neto di fondo for di exterior pa e mesun suma. E total na activo neto internacional a subi cu Afl. 72.6 miyon (incluyendo diferencianan positivo den revaluacion di oro y reservanan internacional) te na Afl. 1,577.1 miyon na final di December 2009, cual ta ekivalente na 5.7 luna di pagonan di e cuenta coriente (excluyendo e sector petrolero).

- Advertisement -

DUNA COMENTARIO

Please enter your comment!
Please enter your name here