Home Politica FALTA DI DECENCIA

FALTA DI DECENCIA

1
0
SHARE
- Advertisement -

Analisis politico

ORANJESTAD (AAN): Cada ken na Aruba por discuti si Andy Lee tin razon di baha como Presidente di Staten pa motibo di e nivel di nos parlamento bao di e miembronan di MEP. Argumentonan pa e keda como Presidente ta cu door di no keda enfrenta e miembronan di MEP e cambio cu hopi ta desea no ta bin.

   Si no para firme y pone hendenan manera Booshi Wever na nan luga nunca lo bin e cambio tan desea den nos sala di Staten y eyfo. No por ta cu un mentalidad asina putri manera esun di Booshi Wever sosteni door di su coleganan ta determina e nivel di debate.

   Ta berdad cu e mentalidad di un Booshi hunto cu su coleganan no mag determina e rumbo di nos parlamento. Pero e problema ta mas grandi cu solamente e miembronan den parlamento di MEP. Tin un nucleo di MEP cu tin e mentalidad di Nel Oduber bin abao. Nan tin un mentalidad mesquino cu ta pensa den un direccion su. Nan no ta actua a base di pensamentonan serio pa loke ta bon pa nos pueblo y nos pais.

   Nan concentracion ta ariba kico kico ta bon pa nan y nan no tin ningun interes den e bienestar di nos pueblo. Nan no ta actua a base di argumentonan logico pero nan ta actua agresivo contra tur hende y tur cos cu no ta di nan. Loke Booshi a haci den Staten ta loke nan ta haci tur caminda. Nan no tin ningun sorto di respet pa ningun hende y pa nada. Nan gobernacion ta asina, nan campaña ta asina y nan comportacion den Staten tambe ta asina.

   Ta pesey cu hasta un hende muhe cu ta nobo den politica manera señora Eveline Wever Croes ta core defende Booshi. E mentalidad di tur ta mescos. Hopi a spera di tende di un miembro di Staten cu a caba di drenta e arena politico cu e si no a di acuerdo cu e manera baho cu Booshi a actua den Staten y cu e lo contribui den su partido pa maldad di e Booshinan den Staten worde para. Nada di esey. Sosten completo pa e bagamunderianan di Booshi. Nan posicionnan no  ta basa ariba argumentonann sano.

   Zundra, gaña, palabranan malo y grita duro ta nan sistema y cu esaki aparentemente un hende manera Andy Lee no por biba. Caminda un hoben politico bon educa, bon studia kier sacrifica añanan di su bida pa yuda construi un miho Aruba pa nos tur e mester biba bao di e stress di hendenan vulgar cu ta actua manera hendenan di caya sin lo minimo di educacion.

   Como Presidente di Staten e mester sinta pasifico ariba su stoel y wanta tur sorto di barbaridad di e Booshinan den Staten. E tin un bon studio, no un diploma falsifica, e tabatin su dilanti un carera grandi como academico y hefe di un departamento improtante pa nos isla. E a dicidi di duna su capacidad na su pueblo y loke e ta haya ta fiserei di mentenan sushi. Tur esaki ta pone e partido AVP den problema serio si pasobra caminda e partido aki ta busca hendenan capacita bon studia, bon prepara pa drenta den politica pa haci un trabao grandi pa nos pais nan ta topa cu mentalidadnan putri cu ta insulta nan tur dia.

   E solucion no por ta cu e partido cu kier trece cambio mester pone ariba su lista bringadornan di caya  pa pasa e tipo di Booshinan un paar di kantiman pa para nan sinberguenzerianan. Esey ta e situacion na Aruba awe. Pesey nos ta keda enfatiza cu eleccion no a cambia nada di e mentalidad di e dirigentanan di MEP y si mayan nan mester ta den gobierno atrobe nan lo haci mescos cu loke nan a haci e ultimo ocho añanan.  Nos kier hasta bay asina leu cu nan no por yuda.

   Nan ta kere seriamente cu e manera cu nan ta actua ta e manera corecto pa actua. Nan a castiga nos pueblo innecesariamente pa ocho aña largo y nan no ta sinti cu nan a haci algo malo, alcontrario. Ta esaki ta e problema cu hendenan manera Andy Lee tin di enfrenta y cu ariba un cierto momento ta yega na e conclusion cu no ta esey e a escohe pe. Esaki ta comprendibel pero si di lamenta pasobra nos mester di hende manera Andy Lee pa yega na cambio di mentalidad cu tanto nos mester. Ta di spera cu AVP yega na un bon solucion.

 

- Advertisement -

DUNA COMENTARIO

Please enter your comment!
Please enter your name here