ORANJESTAD (AAN) — Manera costumber, fraccion di PDR a tene su rueda di prensa semanal diamars cu a pasa den Parlamento.
Mr. Andin Bikker, lider di fraccion, a toca seis punto di agenda. Na prome lugar el a referi na un reunion cu el a pidi cu WEB, Elmar y Cable, cu den e articulo aki nos ta referi na dje.
Ademas el a elabora riba e reunion bipartite den cual un delegacion di Parlamento di Aruba a participa, y unda a papia tocante e airport tax pa pasaheronan interinsular, y un sistema competitivo di belasting cu lo adapta na Bonaire.
Tambe el a trece dilanti e medida cu SVb ta aplicando riba permiso di maternidad, na damanan na estado cu ta pasa un of dos dia, pa acerca e instancia.
El a duna su criterio tocante e argumento di minister Otmar Oduber encuanto e tarifa cu Arubus lo mester cobra y finalmente a elabora riba e concepto di ley iniciativa, cu otro siman e lo presenta, tocante reconocimento di diplomanan medico no otorga na Hulanda.
WEB, ELMAR Y CABLE: Bikker a bisa cu den su condicion di presidente di e comision permanente pa loke ta trata companianan estatal, el a pidi WEB Aruba NV y tambe NV Elmar pa bin duna e comision un bista riba diferente aspecto.
Entre otro, e parlamentario a menciona, pa nan splica riba e frecuencia cu e suministro di coriente ta bay na Aruba ultimamente, y tambe pa nan contesta e pregunta con ta posible cu un average di 20% di coriente ta worde produci sin tin mester di brandstof pero tog e brandstofklausule riba e cobranza pa consumidor ta worde calcula riba 100%.
“ E siman aki diahuebs y diabierna nos ta bay tin reunion respectivamente cu WEB Aruba NV y cu NV Elmar, y tambe tin otro reunion cu mi a yama pa e comision aki cu cable. Pasobra, manera mi a anuncia un par di siman pasa, mi ta kere cu en bista cu schoolnan te ainda ta usando Hulandes hopi frecuente, como e idioma di instruccion escolar, pa nos por wak si den e pakete basico di cable nan por incorpora canalnan hulandes, unda e muchanan ora nan ta wak television, por bin den contacto mas frecuente cu e idioma Hulandes y asina nan domine mehor”, mr. Bikker a menciona.
