Fraccion di PDR cu tres remarca riba tereno di enseñanza
Basa riba sondeo haci den pueblo:
ORANJESTAD (AAN) — E siman aki tin tratamento di e presupuesto di Enseñanza, y Fraccion di PDR a haci un sondeo den pueblo pa saca afo kico ta e obstaculonan cu nan kier pa worde drecha.
Asina lider di fraccion PDR a señala den conferencia di prensa semanal. Tres remarca fraccion di PDR a haya den comunidad, y el a referi na cada un.
STUDIE LENING PA MERCA:
E prome aspecto cu e parlamentario a menciona ta e “studie lening” pa nos studiantenan cu ta bay sigui estudio na Merca, cu nan ta haya e ta demasiado abao. Tambe tin un maneho cu si e studiante ta fia, por ehemplo, un total di 40 mil dollar, e mester obligatoriamente haya solamente 10 mil dollar pa aña.
Pero tin hopi estudio cu no ta dura, necesariamente, cuatro aña mas, pero por haci nan aceleradamente, y diez mil dollar no ta yega den un aña.
“ Mi ta corda cu mi mes a yega di bay Corte pa varios hende riba e mesun topico aki, y mi no ta compronde di con nan no ta haya mas si ta un fianza y no un regalo. Fia bo ta fia y bon tin cu pague back, anto nan ta bisa bo con bo ta bay gasta e placa cu nan ta fia bo”, Lider di fraccion di PDR a señala.
E ta corda tambe cu tin un studiante cu a keda pega meymey di su estudio pasobra e tabata falta 36 mil dollar adicional. “Su estudio tabata cortico, di dos aña y mey, y aunke el a firma y el a haya promesa verbal cu e lo por haya e suma pa e caba e estudio akinan, Directie Onderwijs a lague bay studia y nan ta caminda nan a tranke”, mr. Bikker a subraya.
Esaki ta un keho cu e Parlamentario a haya for di studiantenan di Colegio EPI cu a bay bishita Staten, y cu a trece esaki dilanti.
TEST PSICOLOGICO:
E di dos aspecto cu tambe e fraccion di PDR ta haya hopi comentario riba dje, ta cu pa via di e famoso test psicologico, si un mucha cu ta bay trahe no ta mucho bon di salud, y lamentablemente e test ta sali malo, e por tin 8-9-10 den full su school basico, cu asina mes, a base di e test psicologico cu aparentemente ta super determinante, e ta haya un conseho negativo y ta haya su mes ta bay un school siendo cu e ta mas capacita pa bay e school aki, y nan ta kita un oportunidad for di dje.
Lider di PDR a acentua cu esaki ta lamentable, pasobra e sistema Hulandes cu Aruba a hereda door di leynan mutuo, ta stroba varios di nos muchanan pa yega na e maximo potencial, door di e test psicologico aki.
EDAD PA DRENTA EERSTE KLAS:
Un di tres remarca ta e hecho cu tin varios mucha cu pa motibo cu nan a nace un dia, dos dia, un par di siman for di e fecha cu ta worde stipula pa nan por worde admiti na Eerste Klas, nan ta perde henter un aña di school.
Parlamentario mr. Bikker a indica cu mester wak si den e maneho lo por haci di un of otro manera un “assessment test” of cu por haci excepcionnan pa e muchanan aki por bay school, sin perde un aña escolar completo.
“Y den e filosofia di nos partido tambe, den nos campaña nos a yega di propone pa bin cu un ‘summer school’, pa e muchanan cu por ta pa un of dos vak, of pa un par di punto nan a keda sinta, si nan por worde guia pa nan por bay over.
Si ta casonan di duda, pa nan no tin cu bay haci un aña completo di nobo, pasobra como mayor bo mester bay practicamente cumpra buki nobo atrobe, full un aña e tin cu bay pasa tur e materianan, loke ta innecesario y desproporcional”, mr. Bikker a señala.
