Mama y dos yiu a pidi polis pa bay cu e tata
ORANJESTAD.(AAN) Na Moko diadomingo marduga patruya di Noord a bay atende un caso relaciona cu problema familiar. Alcohol lo a hunga un rol y esaki lo a causa e problema entre un pareha. Polis a presenta na e direccion y pa cuminsa a scucha e señora di inicialnan R.K. naci na Guyana di 46 aña. El a bisa polis cu su casa, e homber di inicialnan M.N. tambe naci na Guyana di 49 aña a presenta na cas burachi y a bise cu e tin boshi di homber. E señora a sinti su mes ofendi y a rabia, pasa man pa e boter di rum y a benta esaki afor. Pero e homber tambe lo a rabia pa e accion di e señora y a destrui windshield. Pa colmo e homber kier a keinta zeta cayente pa basha riba e señora.
E version di e mama a wordo confirma pa su dos yiunan y tambe a bin acerca cu e homber M.N. a dal su yiu homber cu zaag di man na su braza robez. Despues cu polis a scucha e version, nan a confronta e homber cu e declaracion compila, pero el a nenga e acusacionnan.
Tanto mama y su yiunan a bisa polis pa bay cu M.N. Asina mes e homber a laga sa di no a hasi nada, pero pa su seguridad y otro polis a detene e homber Guyanes .Polis a bisa e señora y e yiu homber cu nan por pasa entrega keho na despacho di recherche si nan ta desea esaki.
