Diario Online

Negligencia di un huisdocter y un verpleegster indiferente na eerste hulp!

Publication: Monday, 28 June 2010. Categoria: Politica

Mi sosten moral na e mocion di AVP:
ORANJESTAD (AAN) — Den conferencia di prensa di AVP, e siman aki, e lider di fraccion drs. Rene Herde, a duna di conoce cu su partido a presenta un mocion na Minister di Salubridad Publico, pa tene cuenta cu e kehonan cu tin den comunidad, relaciona cu servicio medico.
Segun mi, ta pa prome biaha cu den Parlamento ta surgi un mocion cu un peticion asina pa un minister di salud, y ohala berdad e mandatario tene cuenta cune, pasobra e ta na su lugar.

Ehemplonan tin diferente den nos comunidad, pero logicamente no mester generaliza y haci comosifuera tur docter di cas ta neglisha pacient, of cu tur ora servicio di emergencia di HOH ta laga di desea.

No obstante, cu tin cierto docternan di cas ta negligente y cu tin biaha bo ta topa cu un of otro verpleegster indiferente, na Eerste Hulp, ta un realidad! Y esaki ta mi critica awe, ya cu esaki ta e di dos biaha cu ta sosode cu un di mi nietonan, y e biaha aki cu un di apenas 1 aña y mey.

Mi nieta tin un problema cu ora e haya griep y tosamento masha lihe su pulmonnan ta yena cu slijm, y ta haya keintura hopi halto. Diabierna cu a pasa, su mayornan a hibe docter di cas na Cas di Docter, pasobra for di Diahuebs nos a nota cu e ta hayando hopi slijm atrobe y su curpa ta bira cayente (ni un hende mester ta docter pasa cu esey ta signo di infeccion).

Tambe nos ripara cu e mucha ta acepta likido so pa bebe, pero e ta rechaza cuminda solido, algo no usual den dje, pasobra e ta mucha cu gusta come. E docter femenino di Cas di Docter a check e mucha y a bisa cu su pulmonnan ta limpi, y a djis recete un stropi pa tos, y a bisa su mayornan “si e ta empeora, trece bek” (increible!)

Mi no por compronde ta di con mester warda te ora e situacion di un hende “empeora” pa bin bek, anto pa wak e ora ey si e persona merece di e cuido. Un tipo di mentalidad cu sigur, no ta cuadra “at all” cu e maneho cu Minister Visser ta propaga, esta, “preveni”.

Nos a haya e actitud di e doctor masha straño pasobra e mucha su pecho cada bez tabata zona mas mahos cu su rosea, ademas cu un keintura di mas cu 39 grado. Nan a bin cas pero e mucha su condicion no a mehora. Den oranan di madruga su mama a hibe servicio di emergencia, pasobra e tabata sumamente inkieto, e sonido na su pecho mas pisa y nos por a asumi cu e ta haya dolor ora di tosa pasobra e ta yora.

Na servicio di emergencia un verpleegster a djis tuma su pols, anto a bisa e mama “e pols ta normal, kiermen e mucha ta bon” sin cu e docter a wake. El a aconseha mayornan pa hibe docter na warda su dia siguiente, y a bin cu un zeptil den su man pa e mama, cual e no a tuma pasobra poco prome cu bay hospital ya el a pone e mucha un supositorio di Paracetamol.

E mama ta un persona studia den un rama di medicina, y sa masha bon na ki momento ayudo di docter ta necesario! Pues, e docter mes no a wak e mucha.

Di madruga te ora mainta a habri mester a refresca e curpa di e criatura varios biaha cu awa low, pasobra keto bay e keintura a keda bay halto.

Wel, nos ta hopi gradici cu docter van Trigt cu tabata na warda diasabra. Mainta e mayornan a hiba e mucha na consulta, y e docter a haci un bon chekeo cune, el a splica e mayornan cu e mucha su pulmonan ta yena cu slijm, y el a mustra nan con na haltura di su repchinan (riba su barica) por mira cu e tin dificultad pa hala rosea.

Mesora el a skirbi riba recipe e remedi y aparato pa nebuliza e mucha, e antibiotica rekeri, y stropi pa tosamento. Ya cu e tratamento aki ayera mainta nos por a ripara cu alivio a cuminza, e keintura no a keda subi y nos ta spera cu e antibiotica y e nebulizacion lo yuda pa aki un par di dia su problema di slijm mehora.

Esaki ta e di dos biaha cu nos a haya un experiencia amarga cu un nieto, tanto cerca e docter di cas como den servicio di emergencia. Mi no por compronde di con si den servicio di emergencia tin un docter, e pacient tin cu bay cas sin haya su control.

Pa baha slijm acumula, Eerste Hulp tin un mashin pa haci nebulizacion, cu por yuda un mucha cu hopi slijm haya alivio y bay cas drumi mas trankil, pero no! Nan ta manda muchanan cas sin haci uso di e aparato aki (no ta prome biaha cu mi sa scucha mayornan conta e mesun cos aki).

Mi no ta kere cu e problema tabata cu Eerste Hulp tabata yen, pasobra mi a keda sorprendi cu menos cu mey ora despues cu mi nuera a sali cu e mucha pa Hospital, el a yama mi, bisa mi cu nan ta na caminda pa cas caba.

Ta obvio cu mi nieta tabata tin mester di yudanza tur dos biaha cu nan a hibe, prome na docter y despues na Eerste Hulp. Yudanza cu danki Dios el a haya cerca dr. van Trigt diasabra mainta.
Si ta fada cierto hendenan ta di trata cu pacient, lo no ta mehor pa nan busca un otro cos pa haci? Mi ta referi mas tanto na e verpleegster concerni di Eerste Hulp.

Con por ta cu e no a pasa e mucha cerca e docter? Nan tin un nebulizador hopi efectivo eyden, ta mucho trabao pa nan, pa sikiera sinta e mucha un rato eyden y pone e aparato pe?
Si e mucha tabata su famia, por ta su yiu, e lo a mande cas atrobe cu keintura halto y yena cu slijm, siendo cu e por a haci algo pe? Mi ta duda!

Den caso di mi nieta un solucion nos tin cu busca, maske con dificil e ta mustra, ya cu mayoria di docter Arubiano no tin espacio pa tuma mas pacient. Mi ta pensa cu si alomenos tabata tin e opcion pa por a paga pa consulta priva cerca un otro docter, e situacion aki lo por a cana otro.
Na mi opinion, escogencia medico mester ta un derecho di tur hende, maske cu mester paga pa consulta priva pa yega mas cerca di e cuido cu AZV no ta brinda.

Moralmente, ami ta para full tras di e mocion presenta pa e fraccion di AVP, y mi ta spera cu minister Visser dune su debido atencion pasobra sin duda, pueblo henter kier esey.

Mi ta reitera cu no mester generaliza, pero si mi ta haci enfasis cu basta un docter pa neglisha un pacient, cu basta un hende na Servicio di emergencia cu actitud indiferente, pa consecuencianan grave por surgi.

Mi sa cu e articulo aki no ta bay cay den bon tera cerca esnan concerni. Tampoco mi a consulta na cas prome cu a skirbi e, pasobra mi ta cansa cu e ciudadano na Aruba, pa loke ta tereno di salud, tin temor di identifica su mes, pa “miedo na represalia”.

No Shonnan, no por ta asina!
Cada cos tin un lugar y cada ken mester identifica su mes, ora di trece un denuncia publicamente. No tin otro manera pa, kizas, un poco di atencion wordo poni na e tipo di situacionnan aki, for di esnan cu tin e autoridad y poder pa haci algo!
Redacta pa Mercedes Abdul.