Parlamentario Yrausquin cu mocion pa revisa henter ley di salario minimo
Pa elimina e discrepancia entre 40 y 48 ora di trabao semanal:
ORANJESTAD (AAN) — Parlamentario Juan David Yrausquin, di fraccion di AVP, a presenta un mocion cu ta regarda sueldo minimo. E mocion aki a carga aprobacion di e 21 miembronan di Parlamento, ya cu sueldo minimo ta hopi amplio den nos comunidad. Parlamentario Yrausquin a menciona cu sueldo minimo aworaki ta na 1.542 florin pa luna y e ta wordo evalua anualmente, y tin biaha e ta wordo adapta na aumento di costo di bida. Esaki ta sosode basa riba ley y conseho di Social Economische Raad (SER).
Yrausquin a subraya cu sueldo minimo no ta depende di cuanto ora e persona ta traha y mesun suma ta conta pa un persona cu ta traha 40 ora pa siman cu pa esun cu ta traha 48 ora semanal y e ta mira un discrepancia den esaki.
Esaki ta trece cune un diferencia grandi den e sueldo unda cu e persona cu ta traha 48 ora pa siman ta gana fls. 7.40 pa ora, y esun cu ta traha 40 ta gana fls.8.90 pa ora, cu ta haci un diferencia di casi 20%, loke fraccion di AVP ta haya ta inhusto. E 21 miembronan di Parlamento a bay di acuerdo cu mester bin un cambio.
E mocion ta pa bin cu un ley dentro di seis luna maximo, pa mara sueldo minimo na 40 ora pa siman, y wak otro puntonan interesante unda por tuma como ehemplo e sistema na Hulanda.
Yrausquin a splica cu na Hulanda sueldo minimo ta wordo evalua dos biaha pa aña y no un so manera na Aruba.
Yrausquin a pidi pa haci un evaluacion di henter e ley y introduci e cambionan necesario na un forma responsable, y esaki logicamente no por sosode di un dia pa otro. Mester wak tambe e consecuencianan cu e cambionan por trece pa nos economia, segun e Parlamentario. Pesey esaki mester bay den consulta cu S.E.R cu tin e presencia di gobierno, sector priva como dunador di trabao y sindicatonan cu ta representa trahadornan.
Yrausquin a bisa cu e intencion ta pa haci e salario minimo mas husto tanto pa e comunidad como pa e dunador di trabao. Tambe el a subraya cu sueldo minimo ta mara na un ley y no ta gobierno por determina sino cu e ta actua segun proposicion di S.E.R. Gobierno no por hacie di otro forma, sinembargo fraccion di MEP ta haci comosifuera ta nan a hisa sueldo minimo.
El a remarca cu esaki no ta e caso y a reitera cu S.E.R ta determina esey.
Ademas, Parlamentario Yrausquin a trece dilanti cu si e salario minimo ta wordo adapta riba su mes e no ta nifica cu mehoracion di e poder di compra, pasobra e ta basa riba inflacion. Mas halto inflacion ta mas halto e compensacion por ta pa sueldo minimo, y atrobe e ta bay den consulta ya cu mester ta cauteloso debi cu e por trece su efecto pa nos economia, ora di haci adaptacion.
