Home General Peaton a pasa susto di su bida dilanti edificio di D.O.W!

Peaton a pasa susto di su bida dilanti edificio di D.O.W!

1
0
SHARE
- Advertisement -

Ora dos auto a purba pasa un truck di gasoline:

ORANJESTAD (AAN) — Ayera, banda di 11.30’ or di mainta, un ciudadano cu tabata bayendo den direccion di e bushalte pabao di aeropuerto, a pasa den un susto grandi, ora e tabata cana banda di Archivo Historico, pues net dilanti edificio di D.O.W.

Manera tur hende sa, relaciona cu e construccion di e turbo rotonde dilanti pomp station di Wayaca, e faha di caminda di tera cu tabata tin, a haya un bon capa di asfalt, cu aunke riba su mes no ta un trattoir, e ta fungi como acera unda e publico na pia por cana. 

Eigenlijk no tin otro manera pa e peaton por cana, ya cu na ningun di e dos bandanan di caminda nunca nan a traha un acera, pero tog a drecha e “faha” di caminda ey cu hendenan no ta cana mas riba santo eynan.

Loke a sosode ayera ta cu un persona cu tabata canando net riba e caminda di asfalt aki, ora e tabata pasando un tiki pariba di Archivo Historico, a scucha e ruido di tire di auto masha pisa patras di su lomba.

E ta conta cu ta Dios, su angel wardado y su propio instinto di supervivencia, a haci cu el a hala na su man drechi masha lihe.

Locual el a constata ta cu un truck cu ta distribui gasoline tabata biniendo den direccion di e luznan di trafico y dos auto chikito a purba pase, un na man robes otro na man drechi.

Esun na banda drechi, cu solamente e por a mira cu ta color blou scur, a subi e faha di asfalt te cu e tire a keda bon marca, y e ta sigur cu si e no hala for di e caminda lihe e auto aki lo a dal’e.

Na e velocidad cu e chofer tabata core tabata imposible pa e wak e number di auto, ademas cu e persona a keda casi den shock. E mester a sinta un rato riba un baranca pa hala rosea un rato, y hasta el a worde acerca pa un otro peaton cu kier a ofrece ayudo, ya cu el a kere cu algo lo a sosode cune.

El a warda un rato prome cu e por a subi bus chikito, di e susto cu el a haya.

No ta prome biaha cu automobilistanan ta purba di pasa dilanti di trucknan grandi anto nan ta hisa velocidad sin midi e consecuencianan di loke por sosode. Tin casonan di accidente caba cu resultado fatal, cu tabata pa e motibo aki. Un cos ta sigur, no ta importante si tin poco usuario di transporte publico den e barionan di Primavera y Wayaca.

No ta e cantidad ta conta pero si e bida di hende, unda cada un ta importante. Cada ken cu cana eybanda pasobra no tin auto propio, tin un famia, tin un trabao, tin un bida productivo ainda.

Un yamada atrobe ta bay pa ing. Jossy Figaroa, pa por fabor busca un manera, si ta posible un zebrapad, pa e peatonnan eybanda por cruza caminda un poco mas safe.

E caminda ey ta sigui di ta peligroso, y pa colmo autonan ta core na velocidad halto y masha, pero masha poco biaha, tin un chofer cu tin e gentileza di para pa un peaton cruza caya, y ora e peaton logra y cuminza cana tin cu pasa den susto pasobra tin chofernan cu ta core iresponsablemente eybanda, creando mas inseguridad pa esnan cu ta na pia!

- Advertisement -

DUNA COMENTARIO

Please enter your comment!
Please enter your name here