Home General Quota International Of Aruba Cu Seminario Exitoso

Quota International Of Aruba Cu Seminario Exitoso

1
0
SHARE
- Advertisement -

quota_exitoso_ (2)ORANJESTAD (AAN): Diasabra cu a pasa, Quota International of Aruba a organiza su di 22 seminario anual na Hyatt Resort. Dilanti un publico di al rededor di 350 persona, Joe Piscatella a papia tocante e importancia di un bon salud.

   Un di cada 130.000 persona ta muri den un teremoto, 1 den cada 10.000 hende ta muri di accidente di auto, pero 1 den cada 2 persona ta muri di problema di curason. Esaki ta motibo suficiente pa evita problemanan di curason.

   Tin hopi hende ta pensa ainda cu problema di curason ta afecta mas hende homber cu hende muher, pero e realidad ta net contrario. Varios biaha hende hombernan por sobrebibi problemanan, operacionnan y ataquenan di curason mas cu hende muhernan.

   Pero e problema no ta cu nos no sa kico pa haci, pasobra tur hende sa con pa biba saludable. Pero e problema ta cu nos no ta scohe pa biba saludable.

   Un problema serio ta e stress y presion cu nos ta biba aden. Stress ta causa hopi daño na bo curason. Ademas, hopi biaha nos sa kico nos mester haci pa biba saludable, pero nos no ta hacie pasobra ‘nos no tin tempo’ y nos ta laga stress stroba nos di biba saludable. Ora nos ta pura, nos ta come kico cu ta, sin importa si e ta saludable of no.

   Pesey e meta mester ta con pa maneha stress, con pa reconose eventonan cu ta causa stress, y kico pa haci na cada momento pa stress no bira un problema, esta tecnicanan pa aplica tanto mental como fysico. Ta prueba cu hendenan cu por ehempel ta medita of ta bay misa, ta biba 8 aña mas largo cu hendenan cu no ta medita of ta bay misa.

   Un actitud positivo ta sumamente efectivo den tur esaki. Tur cos mester worde poni den perspectiva, y cu un actitud positivo bo ta evita cu eventonan cu normalmente a causabo stress si bo no tabata positivo, lo afecta bo salud.

   Tambe un bon dieta, y informa bo mes di kico bo ta come y si di berdad e ta asina saludable. Por ehempel un salada por ta mas saludable cu un hamburger, pero si bo pone hopi sauce riba e salada e por ta doble mas malo pa bo salud cu un hamburger. Importante ta pa bo traha un sorto di presupuesto: haya sa cuanto vet abo por come pa dia cu ta saludable, y haya sa cuanto tin den cada cuminda, pa asina bo tuma net e cantidad di vet cu ta bon pabo, pero no dimas. Pisca y seafood prepara saludablemente, un porcion chikito di carni cora, olive oil, tur ta ingredientenan cu por yudabo. Trata na modifica bo recetanan y haci escohencianan di restaurant basa riba nan menu di cuminda saludable.

   Pues den corto: bo estilo di bida, con bo ta maneha stress, haci suficiente ehercicio y come menos vet cu ta posible, ta e miho consehonan.

   Joe Piscatella su mensahe ta: si bo no traha tempo awor pa percura bon di bo salud, bo mester traha tempo mayan pa bo malesa.

   Esnan presente a haya e seminario hopi bon mes. Quota International of Aruba por mira atras riba un evento exitoso.

 

- Advertisement -

DUNA COMENTARIO

Please enter your comment!
Please enter your name here