Reunion a resulta exitoso atendiendo mas cu 20 punto di agenda
Ministronan A Dicidi Pa Oficina Di U.E. Establece Na Aruba
ORANJESTAD (AAN): Siman pasa a tuma lugar na Curaçao e ultimo Ministeriele Samenwerkingsraad (MSR) organiza door di Antiyas, un tipo di colaboracion cu a cuminsa cune entre e Ministernan di Aruba y Antiyas despues cu Aruba a haya su Status Aparte. Den e reunion aki, cu tur participante a cataloga como uno exitoso, a atende mas cu e 20 puntonan di agenda inicial cu tabatin.
Emily de Jong Elhage den su prome punto a elabora riba un biahe cu Prome Minister di Aruba mr. Mike Eman a haci recientemente pa Bruselas pidiendo pa establece un oficina di Union Europeo den e areanan aki banda.
Mirando esaki, Prome Minister de Jong Elhage a bisa cu a worde acepta unanimamente pa e oficina aki worde establece na pais Aruba. “Nos lo duna tur nos cooperacion pa Aruba haya esaki,” el a bisa.
Un di e prome puntonan grandi cu a worde atende tabata e asunto di trafico di persona entre e islanan Antiyano y Aruba. Según e mandatario di Curaçao, semper tabata mucho mas facil pa un Arubiano bay establece y traha na un di e islanan Antiyano cu e situacion cu un Antiyano bay traha na Aruba. Pa e motibo aki despues di deliberacion, a dicidi di institui un comision chikito di Curaçao pa mira con lihe por regle. Esaki ta inclui tambe un proposicion cu a bini di parti di Minister Sevinger.
Prome Minister de Jong Elhage a expresa su satisfaccion con e paisnan chikito ta cuminsa realisa awor cu nan mester traha hunto, mescos cu potencianan ta traha cu otro.
E lider di e delegacion di Antiyas a expresa su agradecimento na Gobierno di Aruba, Gabinete Mike Eman I, pa e cooperacion cu nan a duna pa Curaçao por bira un pais riba su mes den Reino. Esaki a pesar den e consensus Rijkswet tabatin cos cu Aruba no kier, y toch a acepte pa yuda Curaçao. Pesey el a manda palabra di pabien na tur esnan cu a contribui pa e fase nobo cu Antiyas lo bay drenta den dje.
