Simia Literario tabata di bishita
ORANJESTAD (AAN): Minister Plenipotenciario sr. Edwin Abath a ricibi bishita di miembronan di directiva di Simia Literario. E delegacion a consisti di presidente señora Gerarda Lauf, tesorero señora Corry Paesch y secretario señora Olga Orman.
Meta di e bishita ta pa cera conoci y informa e mandatario di e existencia di Simia Literario, nan actividadnan y publicacionnan di e fundacion.
Tambe a informa sr. Abath cu na 2011, Simia Literario ta cumpli 10 aña di existencia. Den su diez aña di existencia Simia Literario tabata tin como actividad, tallernan di trabao y charlanan.
Tambe a tene un café literario y un mercado di buki. Otro actividad important eta publicacion di bukinan literario manera ‘Bentana Habri di Quito Nicolaas y Cosecha cu ta un cd di declamacion di diferente miembro di Simia Literario na ocacion nan nan prome lustro.
Sr. Abath a bisa di ta contento pa tende cu tin un organizacion cu ta atende cu literatura na Papiamento y Papiamentu na Hulanda.
Tambe e mandatario a bisa cu semper Simia Literario por conta cu cooperacion di Cas di Aruba – manera e caso den pasado – pa tene charlanan literario.
Como recuerdo di e bishita e delegacion a haci entrega di algun publicacion di Simia Literario na Sr. Abath y tambe un foyeto di Simia Literario cu hopi informacion ariba meta y actividad di e fundacion.
