Ta egoista pa bisa cu no lo desaroya proyecto Horeca importante pa San Nicolas

Publication: Wednesday, 30 June 2010. Categoria: General

Roland Peterson SNBA
E trahador di SN tin e derecho pa dicidi unda traha
ORANJESTAD (AAN)* Segun presidente di SNBA (San Nicolas Business Association), sr. Roland Peterson, el a tuma nota di e acontecimento na unda cu pa prome biaha despues di e closedown di Valero e contratista Douchar a invita prensa pa convivi e momento importante no solamente pa nan sino como simbolo di un esperanza pa desaroyo di San Nicolas como e prome contratista cu ta haci uso di e gate destina pa e contratistanan drenta na pia di e subida di Lago Heights.


E reapertura di e refineria tin un spinoff tremendo pa pariba dib rug, na unda cu durante cu e refineria tabata sera tabata parce cu habitantenan di San Nicolas tabata cana den scuridad cu bela.

Pesey mes SNBA ta hopi contento cu e negoshinan chikito na San Nicolas ta haya directamente y indirectamente entrada for di Valero. E potret publica den prensa di e contratista su trailer dilanti di e gate di Valero ta un potret simpel pero ta bisa mas cu mil palabra.

E confianza poco poco ta lanta back. Diferente persona a deposita nan confianza den desaroyo di San Nicolas, a wak diferente negoshinan ta habriendo na San Nicolas. E no ta manera ta worde bisa na unda cu e hendenan di San Nicolas ta bin cas pa drumi despues di traha pabao di brug.

Manera ta conoci cu gran parti di e poblacion ta traha den horeca na e otro banda di e isla. Awor tin hende ta bisa cu no mester desaroya San Nicolas cu proyectonan horeca grandi pasobra tin miedo di exodo di trahador den e sector horeca na Noord pa San Nicolaas.

Riba e ponencia aki, sr. Roland Peterson a remarca cu esaki ta un pensamento hopi egoista pa motibo cu e trahador mes tin cu dicidi di traha unda cu e kier, sea na San Nicolas cu ta cerca di cas na unda cu e ta spaar gasoline of e por dicidi di keda traha na Noord, e decision ey mester keda den su man.

SNBA a ripara tambe cu mester di nightlife na San Nicolaas of pariba di brug na unda cu e poblacion pariba di brug por bay disfruta pero tambe esaki por atrae hasta turista pa bishita pariba dib rug. Pa loke ta e miedo cu tin bao di personanan pa no desaroya proyectonan di significacion pa e area dib rug pariba, ta Sali for di un punto di bista hopi egoista y ta bira tempo pa San Nicolas tambe worde desaroya. E habitantenan ta prefera pa cumpra cerca di cas envez di gasta gasoline y bay haci compras otro caminda.

Riba e pregunta kico e pensamento ta di e reapertura di e refineria, riba esaki sr. Roland Peterson a duna di conoce cu e ta spera cu esaki no ta pa tende cu den 3 pa 5 aña lo kier bolbe sera atrobe, pero cu e reapertura di e refineria lo ta pa plazo largo.

Encuanto si PDVSA lo ta un partner of supplier pa Valero, sr. Peterson a duna di conoce cu Valero mester sa cu cua partido pa un possible joint venture e tin mas confianza y por segura cu riba base regular y riba un prijs stabil por haya petroleo. E refineria na Aruba a worde traha pa procesa e tipo di crudo cu ta worde haya na Venezuela.

Leave a Reply