Home General Te hasta kima sushi den cura di bo cas tambe ta contra...

Te hasta kima sushi den cura di bo cas tambe ta contra ley!

0
1
SHARE
- Advertisement -

John LarmonieCuerpo Policial Ta Confirma Extra Polis Pa Control Durante Celebracion Dia Di San Juan

Cendemento di candela riba caminda publico por costa bo 500 florin of 6 siman cera!

ORANJESTAD (AAN):  Alto mando policial a confirma extra polis pa tin control durante celebracion di San Juan y Dera Gai.

   Ta conoci cu durante e celebracion aki, cendemento di candela ta tuma lugar hopi caminda locual ta algo ilegal.

   Ora bo ta kima sushi na bo cas tambe ta contra ley. Si bo kima sushi e ta bira un molester pa bisiña y esaki ta pone bisiña yama polis.

    Hopi hende no ta conciente di e peliger y molester cu e huma ta trece cune.

    John Larmonie, vocero suplente di Cuerpo Policial  a splica cu kimamento di sushi y molester di huma ta causa gastonan innecesario. E intencion di e comision celebracion dia di Dera Gai no ta pa kibra e celebracion.

    A agrega cu den e ultimo añanan tambe polis a tuma nota cu tin biaha ta cende candelanan asina grandi y e huma cu ta acumula den cierto camindanan ta un molester y un peligro.

   A señala cu por ehemplo, aña pasa tabata tin un huma hopi grandi riba e caminda principal na altura di Pos Chiquito. Un dado momento te hasta esey ta stroba e trafico. Trafico ta yega topa cu un batayon di huma preto cu nan no por wak ni unda nan ta bayendo.

   Tin diferente aspecto cu por keda menciona, segun Larmonie pero tog tin hopi hende cu no ta conciente di e peliger y tambe e molester cu e huma aki ta trece cune.

   Ta tende for di esnan cu ta traha den Salubridad Publico di hopi hende cu tin cu meld nan mes riba e dia ey na poli pasobra nan ta haya complicacionnan cu halamento di rosea, entre otro.

   A sigui bisa cu tur esnan ta cosnan cu ademas di peliger y molester ta trece gastonan innecesario.

   Pesey mes e idea ta pa sigui promove e celebracion aki pero na un manera responsable. Pesey ta tratando pa minimaliza e candelanan cu ta wordo cendi.

  Polis ta bay ta controlando riba e dia ey y nan a haya ok di alto mando cu ta bay tin mas hende riba warda riba e dianan aki, specialmente pa controla den barionan. No solamente pa acudi na duna asistencia pa candela, pero pa controla den bario.

   Si nan haya bo ta cende candela riba caminda publico sin permiso bo lo haya procesverbal, boet di maximo 500 florin of 6 siman cera.   

   Hopi hende no ta conciente di nos leynan, pero tog polis kier haci un yamado di conciencia na nos pueblo pa educa nos mes, conoce mas di nos leynan pa nos sa cu ta cosnan cu ta contra ley, a bisa.

    Segun John Larmonie, polis kier contribui pa purba di baha esaki lo mas cu ta posible.

   Tur parti di mundo ta conoci cu candela ta un di e disasternan mas grandi cu por sosode. Un candela di mondi por kima un cas di un persona. Ademas di e perdidanan material, e hendenan por haya heridanan grave of hasta morto un candela por causa.

   A reitera cu Cuerpo Policial ta bay controla y mester tene cuenta cu si candelanan bay for di man cu hendenan muri of haya kemadura, e castigonan cu e ley ta trece padilanti ta hopi pisa.      

- Advertisement -

1 COMMENT

  1. A bira tempo pa e pueblo compronde cu ta awa destila nos ta tin pa consumo Na Aruba, y pa locura y malacriansa mester paga candela inesesariamente y paga overtime na e bombero nan. No ta Gobierno ta paga, ta nos e pueblo ta paga pa poco sin gevoel cu no por pensa normalm cu ta sende candela. Mester bisa ken nan ta y seranan pa e abuso cu nan ta cuasa.

DUNA COMENTARIO

Please enter your comment!
Please enter your name here