“THE FINALS” di basketball ta start diabierna awor na Aruba Jrs
RCA Kliphunters vs Dakota Basketball den Liga Menor y RCA Romar Trading vs YMCA Ling & Sons den Liga Superior
ORANJESTAD (AAN)— Diabierna awor ta inicia riba e cancha di Aruba Juniors e finalnan di nos basketball superior, Liga Superior y Liga Menor. Despues di un exitoso campeonato regular unda cu cada team a hunga 15 wega, a tuma lugar siman pasa e playoffnan semifinal unda cu a saca e finalistanan cu lo bataya pa e titulo di campeon. Diamars cu a pasa riba e cancha di YMCA na San Nicolas, e prome weganan a tuma lugar unda cu RCA a supera Estrella cu score di 54 pa 49.
Topscorer pa RCA tabata Joshua Duinkerk y Oscar Concepcion ambos cu 10 punto y pa Estrella a luci Ricky Nelson tambe cu 10 punto.E di dos partido di e anochi a tabata entre YMCA Dakota y San Nicolas.
YMCA Ling & Sons a mustra su superioridad ganando di YMCA Dakota Royals 51-44. E mihornan pa Ling & Sons tabata Alejandro Duinkerk cu 21 y Clive Gario cu 10 punto. Edward Brigita y Anthony Piña tabatin 15 y 13 punto respectivamente.
Diahuebs e weganan a continua na Aruba Juniors unda cu den e prome wega den liga menor, Dakota Basketball a gana di Aruba Juniors Dollar Rent a Car Bulldogs cu score di 81-51. Lorenzo Peterson, Ruandy Gario y Quincy Breell tabatin 23, 17 y 13 punto pa Dakota mientras cu Eloy Ruiz di Aruba Juniors a anota 9 punto.
Despues a sigui den liga superior RCA Romar Trading contra Aruba Juniors Radio Shack Blue Devils. RCA a sali victorioso cu score di 67-59. Richard Williams 16, Roberto Peterson 14 y Raidan Boekhouder 11 tabata e mihornan pa RCA y pa Radio Shack Blue Devils Eugene Kemp y Jomar Richardson tabatin 15 y 14 punto respectivamente.Diahuebs e di dos buelta di e serie best out of three a cuminsa.
Den liga menor RCA a caba cu e speransa di Estrella ganando nan cu e score di 70-64 pa asina bira e prome finalista. Den liga superior YMCA San Nicolas a pasa pa e buelta final ganando di YMCA Dakota 70-57.
Diasabra anochi na Aruba Juniors Dakota Basketball a gana Aruba Juniros Dollar Rent Bulldogs fácilmente cu score di 81-59 unda cu Lorenzo Peterson, Frederick Giel y Peter Pineda tabata tin 20, 15 y 14 punto cada uno.
Pa Aruba Juniors Javier Romney tabata tin 20 y Harwin Ruiz 15 punto. Finalmente RCA Romar Trading a elimina Aruba Juniors ganando e di dos wega di e serie cu score di 79 pa 76. Topscorer pa RCA tabata Richard Williams cu 23 punto y Roberto Peterson cu 17 punto.
Pa Aruba Juniors Jomar Richardson y Sire Rijsdijk tabata tin 16 punto. Cuminsando 7:30 p.m diabierna awor nos lo haya e prome wega cu lo ta den liga menor y lo bai entre RCA Kliphunters y Dakota Basketball.
RCA cu a perde solamente 2 wega durante campeonato regular ta e favorito pa gana e serie, pero mester tene cuenta cu Dakota Basketball cu a bin ta gana su weganan y a elimina Aruba Juniors den e semifinalnan.
E di dos wega ta programa pa cuminsa 9or y lo bai entre YMCA San Nicolas cu a Sali na prome lugar durante e campeonato regular y RCA Romar Trading cu sigui nan riba e tabla di posicion. Esaki lo bira un clash mirando e rivalidad cu tin entre e dos teamnan aki.
Nos ta invita tur fanatico di basketball pa bin wak e weganan di final cuminsando mañan anochi. E finalnan ta continua Diasabra na Aruba Juniors mientras cu Diamars y Diahuebs e weganan lo tuma lugar na YMCA San Nicolas.
