Amablo Geerman a perde caso contra Gobierno diaranzon mainta
Minister Otmar Oduber tin derecho di kita autoridad di e director….
ORANJESTAD(AAN): E director di DOPV a perde su caso den Corte, riba diaranzon mainta. E caso aki el a entama na momento cu gobierno a instala un management team pa trece cambionan positivo pa transporte publico. Prome cu gobierno a sinta tabata tin masha hopi keho contra e forma cu DOPV tabata funciona. Taxistanan y esnan den autobus of otro tipo di transporte publico no tabata tin miedo pa expresa con rabia nan tabata cu funcionamento di DOPV.
Pesey mes minister Otmar Oduber a dicidi di introduce su management team cu a logra trece un aire nobo den e lugar y pone tambe tur hende riba caya pa controla. E reaccion di hopi hende den transporte tabata cu porfin nan a mira movecion. Asina mes Amablo Geerman a traha poco dia coperando cu e management team.
Despues di esey Amablo Geerman a dicidi cu e ta bay entama un caso. Tambe el a meld ziek y gobierno tabata pendiente pa e resultado di e caso prome cu sigui cu e pasonan necesario. Abogado mr Alan Kuster a defende gobierno mientras cu mr Milko Baiz a defende Amablo Geerman. Diaranzon mainta e sentencia a cay y huez a mustra bon cla cu e minister tin e derecho di kita e autoridad di Amablo Geerman como director.
Esey ta netamente loke Amablo Geerman a bringa tambe den corte pa haya e poder back y por firma tur loke cu tin na e departamento. Awor el a perde e caso y ta bon pa tende con lo sigui despues cu su futuro. Den situacionnan asina e relacion di trabao ta daña totalmente.
