Diario Online

Analisis politico……. CRITICA RIDICULO

Publication: Saturday, 10 July 2010. Categoria: Politica

ORANJESTAD (AAN): Respet y aprecio pa Aruba ta creciendo atrobe cerca esnan cu ta importante pa nos desaroyo. Den Reino Hulandes, Union Europeo, Estados Unidos y nos region tin un respet grandi pa nos gobierno nobo. Un di e reflehonan impresionante ta e invitacion cu nos ministro presidente a haya di ministro presidente di Hulanda pa nan dos bay wak e final di futbol hunto cu Prins Willem Alexander y Maxima na Sur Africa. Ta tipico MEP pa di biaha sali cu un critica ariba e hecho cu Mike Eman a haya e invitacion aki. E critica aki ta un muestra mas di e ignorancia y falta di inteligencia di e dirigentenan di MEP. Tambe un falta total pa sinitmiento pa nos pueblo y nos isla.
Probablemente nan a ni ripara cu e Bondskanselier di Alemania tabata na Sur Africa pa wak un wega di Alemania cu tabata ni den final. Esaki ta un signal hopi cla con importante e lidernan di e paisnan ta considera e campeonato mundial aki.

E ta e evento deportivo di mas grandi den mundo. Pero no solamente e ta un competencia deportivo cu ta worde mira door di henter mundo pa promove un deporte sano y stimula tur hende na mundo pa practica deporte. E mundial aki ta mas grandi cu esaki.

Pa a paisnan cu ta den top di e campeonato aki e tin un efecto mas aya cu tin su resultadonan ariba tur sorto di tereno y muy en particular ariba e dsaroyo economico di un pais cu ta score halto den e mundial aki.

Ta hustamente pa tur e motibonan aki tin tanto hendenan di top di e paisnan presente na e weganan na Sur Africa. Cada biaha atrobe e dirigentenan di MEP ta mustra con pober nan mentenan ta. E biahe di Mike Eman pa Sur Africa ta sali diasabra for di Hulanda bula oranan largo pa yega Sur Africa.

Diadomingo e ta bay wak e wega y dialuna e ta ariba avion back pa biaha pa Aruba. Ridiculo e critica di e dirigentenan di MEP ta. Nos ta sigur cu KLM a pone e vuelo na desposicion di Balkenende y Mike Eman y nos ta sigur tambe cu Mike lo paga su hotel su mes.

E presencia di nos ministro presidente den compania di hendenan asina respeta den mundo representando nos pueblo ta algo grandi pa henter Aruba. E mente cremencha di e MEPnan ta maria hende.

E ta asina bergonsozo cu miembronan di nos organo mas halto cu ta Staten ta scupi tanto critica inferior y sushi cu ta worde scucha pafo di Aruba tambe. Pero aki un biaha mas nos mester trece padilanti cu loke ta mas negativo pa nos comunidad ta cu organizacionnan den nos comunidad cu mester tin e capacidad pa por huzga con importante e biahe di Mike Eman ta pa nos pueblo ta bira cara atrobe. Ningun caminda nos por a tende un di e organizacionnan lanta y splica con grandi esaki ta pa nos tur.

Tur ta para un banda scucha e suciedad di MEP y ta keda boca cera yen di miedo. Esaki ta pone cu hendenan ta kere cu ta henter nos comunidad tin e mentalidad di e MEPnan pasobra en bez di mustra desaprobacion pa un actitud asina reprochabel nos ta mira tur bira cara y sconde.

Kico esaki ta? Tur e presidentenan di un cantidad di organizacion na Aruba cu tin responsabilidadnan grandi no ta mira kico ta sosode na Aruba. Nan no ta mira cu nan tambe tin un responsabilidad di purba di caba cu e forza destructivo cu ta afecta Aruba grandemente. Nan berdad no ta realiza cu e actuacion di cobarde aki ta causa Aruba hopi daño.

Na Hulanda awo den medionan di comunicacion ta worde grita na Aruba e comunidad ta desaproba e biahe di Mike psaobera berdad ningun reaccion a bin di e organizacionnan cu lo mester a sali declara cu e desicino cu Mike Eman a tuma di acepta e invitacion di ministro presidente di Hulanda pa bay hunto wak e evento deportivo di mas grandi den mundo ta duna Aruba un honor importante y ta pone nos isla ariba un plan mas halto pa futuro.

Hopi biaha nos a yega di trece padilanti cu MEP ta haci loke nos ta custumbra cune pero cu nos lidernan di organizacuionnan ta guli tur e maldadnan di e dirigentenan di MEP sin duna reaccion ta afectando Aruba negativamente y e pregunta ta keda bin dilanti kico nos mester haci pa cambia e mentalidad aki.