Analisis politico……Nos no mag lubida!
ORANJESTAD (AAN): Nos no mag lubida nos pasado pa siña for di esaki pa nos futuro. E gobierno di MEP durante ocho aña largo intencionalmente a ruina centro di Oranjestad y Sanicolas. E gobierno di AVP prome cu e gobierno di MEP a laga cla atras leynan pa pone e chollernan bao di curatela, a reconstrui un parti di KIA pa por ricibi e chollernan cu a worde poni bao di curatela pa un periodo y a laga atras loke awe yama CEA cu tabata un cuerpo cu tabata encarga pa tene orden muy en particular pa cu e chollernan.
Asina cu MEP a tuma over a cambia tur esaki. Pa e negoshi di permiso cu e dirigentenan di MEP tabatin a cambia e CEA den un grupo di hende cu mester a busca stranhero y cera nan den e parti di KIA cu tabata reconstrui pa trata e chollernan bao di curatela. Di e forma aki e negoshi di permiso di e MEPnan a florece atrobe. E centro di Playa a worde transforma den un centro di choller cu nan cas den corazon di Caya Grandi.
Ariba un cierto momento a surgi un comerciante cu a haya un cantidad di tereno den centro di Playa y a haya tambe un serie di permiso pa tur sorto di luga pa hunga weganan di placa. E comerciante aki a declara den medionan di comunicacion cu partido AVP ta contra e plannan di dje y MEP pasobra nan ta asina bonita y nan ta bay ta cla net prome cu eleccion y door di esey AVP lo perde eleccion. E cabezantenan di DOW e tempo ey tabata mata nan curpa pa coopera cu e idiotismo di MEP na un manera excepcional.
Bestuurskantoor a worde bendi y tur loke ta nos monumentonan lo desaparece pa nos haya salanan grandi di bingo y lo no a laga algo mas di e ricesa di nos historia. E tempo ey e organizacion di e comerciantenan di Caya Grandi kizas sin compronde tur loke a bin a sostene e plannan di MEP y e comerciante. E plan di MEP tabata bon pensa. Y si a ehecuta tur loke nan kier a haci nan a destrui nos centro di Oranjestad pa semper. Nan a hera logra.
Ta na tempo eleccion a duna pueblo e oportunidad di core na mal orden cu e gobernantenan maligno di MEP. Ora mira y tende e mesun hendenan cu a coopera cu e gobernantenan di MEP cu tur nan locura awe diripiente ta papia un otro idioma. Di parti di e plannan pa Caya Grandi nos por a tende e tempo ey di e staf di DOW con lihe e plannan tabata worde prepara.
Ningun di nan no a sali y cuestiona e locura di MEP cu definitivamente a desgracia nos centro di Playa. Ta e mesun hendenan cu a celebra hunto cu Marisol e apertura di e brug na Noord. Nan tabatey ta dal bitter na e occasion ey mustrando nan apoyo total na e proyecto corupto aki.
Ta e mesun hendenan cu awe nos ta tende gaba e gobernantenan nobo cu a bin cu expertonan internacional ariba tereno di enbeyeze ciudadnan tabata esnan cu a cana na man di e malhechornan di MEP. Nos no mag lubida! Gobierno ta bay gobierno ta bin pero e ambtenaarnan ta keda y nan tin un rersponsabilidad di nan mes cu nan mester tene na dje sin importa e partido di e gobierno.
No por ta asina cu pa miedo of pa propio interes nos top ambtenaarnan ta bay cu locura di un gobierno manera esun di MEP. Pesey nos ta keda persisti cu e investigacionnan cu ta worde haci pa saca na cla kico kende a haci den pasado. Mester percura pa esnan culpabel haya nan castigo. No por laga nan bay liber despues di tanto crimen contra nos pueblo.
