Aruba a demostra atrobe cu nos por
Minister di deporte, Dr. Richard Visser:
No solamente den organisacion, pero den competencia tambe
ORANJESTAD(AAN)– “Nos a demostra un bes mas cu nos por”, esaki tabata e prome reaccion di Minister di Deporte, Dr. Richard Visser despues di a pone su mes na altura di e victoria di Aruba durante e di 36 campeonato latino americano di baseball senior division. El a referi na un bes mas pasobra esaki sin duda no ta e prome bes cu Aruba ta titula campeon di e campeonato aki, sino ta e di 2 bes cu nos isla ta bin cas cu e trofeo.
Aña pasa caba nos a demostra na henter e region aki cu nos ta e berdadero lidernan den baseball hubenil, ganando e titulo den forma di invicto. E aña aki nos beisbolistanan a bolbe haci e mesun bon papel y asina retene nos trofeo aki mes na cas!
Un total di 11 pais a participa den e campeonato aki, incluyendo algun pais grandi di Sur America.
Na tur ta papia di 192 pelotero cu a bini hunto riba nos isla pa bataya pa e trofeo di campeon.
“Nos no ta contento solamente pa e triunfo di nos muchanan, pero tambe nos mester ta hopi contento pa e organisacion cu tin tras di un campeonato grandi asina”, segun Minister Dr. Richard Visser a vocifera. E mandatario tin palabranan di elogio so na e comision organisador, kendenan a percura pa por acomoda tur e beisbolistanan, nan entrenadornan, nan mayornan, e fanaticonan cu cada ekipo a trece cune y riba dje percura pa weganan por a tuma lugar den un stadion nobo y di hopi nivel.
“Nos a demostra mundo henter cu nos por, nos tin tur e calidad necesario pa hunga bon baseball y nos tin facilidadnan tambe awor pa por organisa e weganan di mas importante na Aruba mes”.
Gobierno tambe a haci su parti den organisacion di e campeonato aki, cubriendo gastonan di organisacion di e eventonan y e sapatonan di bala pa e beisbolistanan di Aruba.
E peticion pa sapato di bala a bini na ultimo ora, debi cu ta rekeri un sapato di bala special pa hunga riba yerba artificial.
Ta cuestion awor di prepara pa e weganan mundial cu lo tuma lugar entre dianan 16 pa 26 di augustus di e aña aki mes na Bangor na Maine, USA.
Minister di Deporte, Dr. Richard Visser a sigura cu den e lunanan nos dilanti lo por mira mucho mas movecion den deporte, como parti di su plan nacional di salud y deporte di aña 2009-2018.
Den e plan aki e experto riba e materia ta combina su programa di hopi movecion, deporte y comemento saludabel banda di programanan di prevencion di salud como un paso positivo den hiba un bida mucho mas saludabel.
