Aruba a perde contra Venezuela y awe mester gana Panama
ORANJESTAD (AAN)— Aruba a perde contra di Venezuela cu e score abulta di 12 pa 3, caminda Aruba a comete un total di 6 error cu a yuda e ekipo di Venezuela tuma un ventaha amplio for di principio di e partido. Aruba a bringa bek trese e wega te diferencia di 4 careda pero despues a lage bay atrobe cu un par di error y a yuda cu un homerun di 3 careda di e cuarto bate di Venezuela. Apesar di esey Aruba a bati bon cu un total di 7 hit un par di bon bataso pa center field caminda cu e Center a scapa Venezuela sigur na 2 ocacion.
Pitcher habridor di Aruba tabata Jean Pierre Geerman kende a bira pitcher perdedor caminda e la permiti 4 careda den promer ining, ayuda cu 3 error, apesa di esey su pitcheo tabata bon.
Aruba lo ta hungando awe Diahuebs contra di Panama, esun cu gana ta sigui pa e kruis finale, pues nos di Aruba mester gana mayan pa e sigui na bida. Mihor bate pa Aruba tabata Jean Franco Wouters cu tin e bate cayente 2 hit den 4 turno, Shurman Marlin cu 1 hit den 3 turno, Dayon Maduro 1 den 3 turno, Loopstok Signarf 1 den 3 turno, Robert Krozendijk 1 hit den 3 turno y Dwayne Kock 1 hit den 2 turno.
Den Pool A, otro partido tabata Panama cu a suta Costa Rica 11 -1.Pool A: Venezuela 2 gana 0 perdi, Panama 1 gana 1 perdi, Aruba 1 gana 1 perdi y Costa Rica 0 gan 2 perdi. Si nos mira weganan cu falta awe ta: Aruba v/s Panama y Venezuela v/s Costa Rica, pues ganador di e wega entre Aruba y Panama lo pasa pa e siguiente buelta.
Den Pool B, Republica Dominicana a gana for di Mexico 4-2 y Corsow a gana Colombia 7-1. Rep dominicana 2 gana 0 perdi, Corsow 1 gana 1 perdi, Mexico 1 gana 1 perdi y Colombia 0 gan 2 perdi. Weganan pa awe den Pool B: Corsow vs Republica Dominicana y Colombia vs Mexico.
Situacion interesante: Por tin triple empate si Corsow y Mexico gana, si Corsow perde, Mexico gana Republica Dominicana y Mexico lo pasa. Si Corsow gana Mexico, perde Republica Dominicana y Corsow lo pasa.
Hopi interesante e Pool B y esey ta sacando dos pais cu lo pasa pa e siguiente buelta, imagina boso mes cu si mester saca un ganador for di un pool di 4, pense y no tin e mihor segundo lugar. Awe Bo Guia Deportivo lo start pa 10’or via 1270 AM.
