Aruba a sobresali un biaha mas den competencia internacional di triathlon
ORANJESTAD (AAN)— Aruba Triathlon Association a organiza recientemente un competencia internacional di Triathlon na Eagle Beach. Cu hopi animo y perseverancia 97 tri-atleta di Aruba, Venezuela, Merca, Curaçao y Colombia a competi cu otro den landamento, ciclismo y coremento. Esun cu a competi den e distancia olympico mester a landa 1.5 km, después core 40 km riba bais, sigui dor di core 10 km na pia. E distancia sprint tabata net mitar di e ditancia olympico.
Olimpic Distance
E landadornan tawata guia y controla dor di hende den kayak. E evento a tuma lugar na e beach den becindario di Tulip Restaurant/MVC Eagle Beach. E ruta di ciclismo tabata e vuelta entre Costa Linda Beach Resort y Divi Aruba Phoenix Beach Resort. Pa loke ta e careda na pia, esaki a tuma lugar entre ex- Le Dome Restaurant y Amsterdam Manor Beach Resort. Polis motorisa a controla e ruta di ciclismo y na pia.
Den categoria Overall Olimpico Femenino, a sali Aurora Escotet di Venezuela. Na di dos lugar a keda Daniela Montiel di Venezuela y na di tres lugar a keda Sanderijn Dirven di Aruba, kende a bay pues cu e titulo di Campeon Olimpico Nacional Femenino.
Den categoria Overall Olimpico Masculino Aruba tabata e ganador absoluto. E hoben Arubiano Alexander Robert a bay cu e titulo di tanto Campeon Olimpico Masculino Internacional y tambe Olimpico Nacional, na di 2 lugar Gerardo Rincon di Venezuela, na di 3 lugar Gino Hodge di Aruba, na di 4 lugar Ricardo Velasquez di Aruba y na di 5 lugar, e hoben Arubiano Willem Lacle.
Olimpico den relevo
Pa loke ta e competencia olimpico den relevo, Aruba tawata e ganado absoluto. E team di Shaquille Vlaun di Aruba a resulta ganador, na di 2 lugar e team di Richard Rasmijn di Aruba y na di tres lugar a keda tambe di Aruba, e team di Sary Dekker.
Sprint Distance
Pa loke ta e competencia di sprint (landa 750m-ciclismo 40km-core na pia 10km), Aruba tawata e ganado absoluto den e categoria femenina y masculino. E Arubiana Shariska Winterdaal, mihor conoci como e “running diva”, a gana den e categoria femenina, na di 2 lugar Chantal Ecury (Aruba), y na di 3 lugar Viviana Lenarduzzi di Venezuela.
Den e categoria Sprint masculino Overall Aruba tawata e ganado absoluto. Na prome lugar a keda e hoben Arubiano Ericson Lake, na di dos lugar Martijn Balkestein (Aruba) y Renze Postma tambe di Aruba. Aruba Triathlon Association kier a agradeci tur e organizacionnan y patrocinadornan cu a hasi e evento aki posibel y un danki di curazon ta bay na tur e boluntarionan cu a yuda p’e evento aki tabata un exito rotundo.
