Aruba Triathlon Association ta felicita Alexander Robert y Gino Hodge
ORANJESTAD (AAN)— Despues cu Alexander a gana Curaçao Olympic Triathlon y Gino na segundo lugar e dos mihor tri-atleta di Aruba na e momento aki a sali pa Cartagena, Colombia pa participa na e Copa Panamericano di Triathlon. Dia 12 di Juni ultimo nan a competi den e distancia olimpico 1500 m. landa, 40 Km core bicicleta y 10 Km na pia. Den un calor tremendo di 34-36 grado caminda 25% di e participantenan no por a caba e competencia, Alexander a logra un 3 lugar medaya di brons de e categoria 16-19 aña, Alexander a landa 27:01 core bike 1:14:00 y core na pia 56:20 pa un total di 2:37:21.
Gino tambe a logra un medaya di brons den e categoria 30-35 aña, landa 36:37 core bike 1:12:25 y na pia 49:31 pa un total di 2:38:33. Dia 14 di Juni nan a competi de e distancia Sprint cu ta 750 m. landa 20 Km core bicicleta y 5 Km na pia, aki si mayoria participante a logra caba e careda ya cu e dia tabata un poco mas fresco 30 grado.
Alexander a logra otro 3 lugar medaya di brons cu un total di 1:06:59, landa 11:07 core bicicleta 35:32 y core na pia 20:20. Gino a logra un di 4 lugar cu 1:12:00 total landa 15:10 core bicicleta 36:06 y na pia 20:44.
Aruba Triathlon Association kier a felicita e 2 atletanan cu nan logro cu a demostra cu nan ta e mihornan na e momento aki, ya cu nan tabata tambe e prome 2 atletanan local den e Aruba International Triathlon Alexander prome lugar general y Gino 3 lugar general.
ATA tambe kier a gradici Subsidie Commissie y Comite Olimpico Arubano cu a haci e viahe pa Colombia posibel. A.T.A. kier a desea Alexander Robert hopi exito na Mayagüez, Puerto Rico. Alexander ta representa Aruba den Triathlon na e weganan Centro Americano y del Caribe.
