Atletanan di Landamento di Aruba a logra e di 6 lugar den Caribbean Islands na Cuba
Atletanan a logra entre otro 9 medaya di oro, 9 di Plata y 6 di Bronze
ORANJESTAD (AAN)— Siman pasa e seleccion di landamento di Aruba a regresa for di Cuba despues di a participa den e di XVIII Caribbean Islands Swimming Championships na Havana, Cuba. Na e Campeonato a participa e mihor landadornan di Caribe den e 4 disciplina acuatico: esta landamento, waterpolo, landamento sincroniza, y landamento den lama. Aruba a participa solamente den landamento cu 14 atleta.
E atletanan aki a prepara nan mes pa varios luna largo bao guia di Head Coach Ismael Santiesteban y assistant coach Ynocente Chacon pa por representa Aruba durante e Campeonato aki, cual por ta mira como esun di mas grandi di e aña aki pa categoria di edad.
No por descarta cu nos atletanan a keda asombra cu e situacion menos ideal na Havana pa loke ta trata estadia y e compleho deportivo, toch e atletanan aki a haci un tremendo trabao, nan a mustra nan abilidad di adapta y e confiansa den nan mes pa saca e mihor posibel resultadonan.
Un otro situacion lamentabel y tristo tabata durante e di 2 dia di e Campeonato na momento cu e atleta Sue-Gin Arends mester a retira for di e Campeonato door di un blessure di su schouder, esaki a sosode net durante e careda di 200 Vlinderslag na unda Sue-Gin tabata bayendo pa gana e medaya di Oro, Sue-Gin mester a stop di landa. Sue-Gin a gana 2 medaya e promer dia caba y e tabata favorito pa gana medaya di tur su eventonan.
Pa promer biaha den historia di landamento di Aruba, e seleccion di Aruba a logra drenta e Top 5 pa loke ta trata e tabla di medaya. Den puntacion nos a finalisa na di 6 lugar, lo cual tambe ta e posicion mas halto cu Aruba a yega di logra.
Aunke cu no tur 14 atleta por a logra gana medaya, tur atleta a yega final (Top 
den nan eventonan y asina tur 14 a yuda pa Aruba yega na e di 6 lugar di tur e paisnan presente. Otro desaroyo hopi positivo pa e deporte di landamento di Aruba ta e participacion di un team di estafet den e Campeonato aki.
Door cu nos ta un pais chikito, e ta hopi algo dificil pa por tin 4 atleta den e mesun categoria di edad riba nivel pa e campeonato aki. E aña aki Aruba tin un estafet tremendo den e categoria 13-14 mucha muher consistiendo di: Cindy Maduro, e dos rumannan Ally y Gaby Ponson y Daniella van den Berg.
Durante CARIFTA (April na Jamaica), ya caba e estafet aki a gana 2 medaya di Oro y 2 bronze y a logra kibra 2 Record di CARIFTA. Awor aki na Cuba nan a mustra un biaha mas cu nan ta un ekipo historico. Ally, Cindy, Daniella y Gaby a logra gana tur dos e eventonan di estafette y tambe a kibra e record di CISC den e 4 x 100 Vrijeslag estafet. Na mesun momento nan a pone e Recordnan Absoluto y di categoria aki na Aruba ariba nan nomber.
E resultadonan di medayanan individual:
Jordy Groters
3 Oro (200 y 400 wisselslag, 10 schoolslag)
2 Plata (50 y 200 schoolslag)
1 Record Arubano di di Categoria (100 schoolslag)
Jemal LeGrand
2 Oro (100 y 200 vrijeslag)
1 Bronze (50 vrijeslag)
Ally Ponson
1 Oro (50 vrijeslag)
1 Bronze (100 vrijeslag)
1 Record Arubano di di Categoria (50 vlinderslag)
Ashley Groters
1 Oro (200 vrijeslag)
1 Bronze (200 schoolslag)
Daniella van de Berg
3 Plata (200 y 800 vrijeslag, 400 wisslslag)
1 Record Arubano di di Categoria (800 vrijeslag)
1 Record Arubano Absoluto (800 vrijeslag)
Gaby Ponson
1 Plata (100 vijeslag)
1 Bronze (50 vrijeslag)
Sue-Gin Arends
1 Plata (50 vlinderslag)
1 Bronze (100 rugslag)
Tyreke Wernet
1 Plata (50 vrijeslag)
1 Bronze (100 vrijeslag)
Renze Postma
1 Plata (1500 vrijeslag)
Saskia Postma
2 Record Arubano di di Categoria (400 y 800 vrijeslag)
