Diario Online

Atraco di mas di 110.000 Florin riba Lotto pa Deporte

Publication: Wednesday, 28 July 2010. Categoria: General

ORANJESTAD (AAN): Algo inespera a socede Diamars atardi den area di Dakota, ora cu un suceso alarmante a socede. Na momento cu banda di 6:00 p.m. cu e Director interino di Fundacion Lotto pa Deporte a yega pa asina busca e trahador, pa asina nan bay deposita e placa, for di e oficina den Avenida Milio Croes, cu e suma di como 110.000 Florin den nan poder, nan a worde sorprendi. E placa tabata bayendo pa worde deposita na banco.
Ora cu el a sali for di patras banda di stage na Aruba Entertainment Center, e dos atracadornan a sali di golpi riba nan. Cu cara tapa, bisti full na preto, y arma di candela potente den man apuntando riba e director y e trahador nan a exigi pa e placa. E atracadornan tin curpa di hende hoben! Asina e atraco a start.

Dos saco grandi yen di placa a worde ranca di nan. Un di e trahadornan te hasta a bay plat pa evita cu nan a tire. E atracadornan a kita e smartphone di e Director interino di Lotto tambe.

Nan a ranca e suma di placa for di nan man, y a baha na awa den un Hyundai Getz color berde, tinted windows, cu V-nummer riba dje. E mesun Hyundai Getz color berde aki a worde mira for di banda di 4’or caba staciona den e cura, parti paden di Aruba Entertainment Center.

Tin henter un grabacion riba e atraco y cualkier informacion por yuda tambe pa polis pone man riba esnan responsable pa e caso aki. Tur cos ta mustra cu aki mester tin un inside info cu a ser duna na e atracadornan. Fuera di esey, tin di check tambe, di con Lotto a stop di usa vehiculo blinda pa transporte di placa.

Pa colmo, e siman aki ya caba un Hyundai color berde tambe tabata envolvi den un atraco arma na San Nicolas, den oranan di madruga riba un hoben. Den DIARIO di awe por lesa mas di esey tambe.

Inmediatamente despues di e atraco na Lotto, alarma a worde bati, y e poco unidad di Polis den area di Oranjestad cu tabatin disponible a bay den e area. Atraco Team di Cuerpo Policial, como tambe demas oficialnan di Recherche a mobiliza pa e area, y a bin haya e personanan victima, keto bay den shock pa loke a caba di socede.