Capitan di seleccion Hulandes Giovanni van Bronckhorst a yega Aruba
ORANJESTAD- (AAN)– Ayera den oranan di atardi capitan di e seleccion Hulandes na Sur Africa a yega Aruba pa disfruta di un vakantie bon mereci. Manera tur hende ta bon na altura e equipo Hulandes a titula sub campion mundial. Un logro grandi. Prome cu nan a bai Sur Africa caba Giovanni van Bronckhorst a anuncia cu e lo stop despues di e mundial aki. Den un wega amistoso diadomingo cu a pasa den “de Kuip”, e stadion di su equipo Feyenoord na unda el a cuminsa su carera na edad di solamente 7 aña, van Bronckhorst a hunga su ultimo wega contra e equipo Real Mallorca.
Pa Giovanni van Bronckhorst, kende tin awor 35 aña, y cu durante su carera impresionante a hunga den e seleccion nacional Hulandes 106 biaha, e despedida tabata hopi emocional.
Na Zuid Africa e tabata capitan di e team Hulandes y a haci un bon trabou.
Su goal den e wega contra Uruguay cu a bin cu un velecidad halto y di basta leu, a impacta tur hende y tabata un di e goalnan mas bunita durante e mundial aki.
Prome Minister di Aruba Mike Eman hunto cu su colega di deporte Richard Visser a bai aeropuerto di Aruba pa yama van Bronckhorst y su famia un caluroso bon bini riba e paraiso aki.
Su cuatro coleganan cu ta aki pa mas di un siman caba a experencia e amabilidad di e comunidad aki cu a sa di duna nan e honor cu nan merece.
Van Bronckhorst sigur tambe lo sera conoci mas di cerca cu nos hendenan cu a biba e mundial aki cu hopi tension y a apoya e equipo Hulandes cu hopi entusiasmo.
