Caso di morto den trafico posponi pa november
ORANJESTAD(AAN): Recientemente Jairo C.G a presenta dilanti di huez, pa motibo cu el a wordo acusa di a core di tal manera den trafico y bao di influencia di alcohol, cu el a bay na banda robez di caminda y dal su auto den un Quadracer. A consecuencia di esaki, un persona a fayece y e otro a keda seriamente herida. Esaki a sosode riba 16 di April 2010. E caso a bin dilanti pro forma, pues huez a bisa cu e lo wordo posponi te cu dia 5 di November. Abogado Chris Lejuez a bisa huez cu e no tin problema pa e caso wordo trata e dia ey, pero el a pidi huez pa suspende detencion di su cliente pendiente di tratamento di e caso, pasobra pa 5 di November, su cliente lo ta sinta caba 7 luna den prison.
Segun Lejuez, tin diferente caso similar unda cu e acusado a haya menos di dos luna di castigo, hunto cu un castigo condicional y trabao pa comunidad. E abogado a menciona algun ehempel unda cu di berdad tin persona cu a causa otro hende su morto den trafico a haya masha tiki castigo incondicional.
Huez sinembargo a bisa cu e ta haya e caso aki hopi serio, mirando tambe cu banda di e hecho cu un persona a fayece, tin un mas cu a keda seriamente herida.
Huez pues a nenga peticion di e abogado y esaki ta pone cu Jairo G. mester keda cera na KIA te dia cu su caso bin dilanti riba 5 di November.
