Home Editorial Cosechando exito tras di exito!

Cosechando exito tras di exito!

1
0
SHARE
- Advertisement -

jossy_mansur_pic      E gobierno actual di AVP ta demostrando un capacidad unico pa logra cosnan grandi pa Aruba. Di e trecemento di e hungadornan sub-campeon mundial te e viahe relampago pa Caracas y un encuentro cu Presidente Chavez, bo ta nota con e efectonan positivo logra ta salta a la bista. Pa loke ta trata deporte, e hungadornan estreya di Hulanda ta mas cu bon bini na Aruba, isla unda nan hazaña a ser observa di cerca, y na unda e apoyo di e mayoria absoluto di nos hendenan tabata total y sin reserva. Robben, kende mi sa mira ta hunga na Alemania, ta un di e mihor delanteronan na mundo. Goleador constante, cualke team den cual e ta participa sa cu e tin riba cancha un magnifico hungador.
        Hulanda, pesey mes, y contando cu un elenco di futbolistanan extraordinario, a titula un biaha mas sub-campeon di mundo, mientras cu e gran faboritonan a ser manda cas for di Africa hopi tempran. Cu e logro di a trece nan Aruba, Mike ta score halto cerca e fanaticonan di e team Hulandes, y nos tur cu ta orguyoso di nos nacionalidad y nos pasaporte. No ban papia mes di e balor den publicidad cu e ta representa pa nos isla! Esey ta incalculable.

       Y e viahe den fin di siman cu el a haci pa Caracas, acompaña pa e Ministro di Relacionnan Exterior di Hulanda, y e Prome Ministro di Antiyas, a caba di comproba cu apesar di e criticanan pa tanto viahamento, nan a ser haci pa trata asuntonan serio cu ta cumbini nos isla. Mike a demostra un biaha mas cu e ta un digno mandatario di Reino Hulandes, y como tal a representa Reino den pasado reciente y lo bolbe represente den actonan internacional di gran categoria. Aruba mester ta orguyoso di tin un yiu di tera asina competente. Aruba mester ta igualmente feliz cu su predecesor a bay descansa na cas, pa no causa nos isla mas berguenza.

       Ta hopi prematuro pa midi e resultadonan di e bishita na Caracas den terminonan politico, pero Mike a demostra cu riba cualke cancha, local o internacional, e por opera riba e nivelnan tanto politico como diplomatico mas halto. Su dominio di Ingles y Spaño, ademas di Hulandes, ta impresionante, y ta ser observa y comenta na Hulanda cu agrado y dmiracion. No solamente el a logra drecha loke su predecesor a daña en relacion cu e politiconan Hulandes, sino cu el a vence hasta e limitenan di loke ta posible. Awendia nan ta papia cu respet y admiracion di nos isla, dunando asina balor na e labornan di nos Prome Ministro y su ekipo di mandatarionan.

       Cu nos por critica Mike de vez en cuando? Esey ta parti di nos tarea, mescos cu ta nos obligacion di resalta tur loke di positivo su gestionnan den Gobierno tin pa nos isla. Sea critica of elogio, nos no ta perde for di bista loke ta pa bin, y cu nos ta spera lo ta un berdadero avalancha di progreso pa nos isla. Ainda Mike tin un mundo di cosnan positivo pa ofrece nos isla; ainda nos por conta cu su influencia na Hulanda y otro paisnan lo aroha frutonan berdadero pa solventa te unda cu e por, e desastre financiero crea pa e previo mandatarionan sin consenshi patriotico; ainda e por redimi nos isla di e bagamunderianan cu e otro gobierno prome cune a laga atras, y demostra cu tanto corupcion como nepotismo no tin bida mas riba nos suela.

        Mi tin e confianza cu e lo traha pa e decoro di un isla laborioso y ordena, pa vence e insolencia cu cual e otronan prome cune a reparti na cada paso durante nan estadia den Gobierno. E hora pa eherce e esfuerzo supremo pa e gloria continuo di nos isla ta batiendo na nos porta, y cu un lider manera Mike, ta existi un confianza fortaleci cu nos ta bay logra!

- Advertisement -

DUNA COMENTARIO

Please enter your comment!
Please enter your name here