Home Editorial DEFENSA PERSONAL

DEFENSA PERSONAL

2
0
SHARE
- Advertisement -

jossy_mansur_picTin Leynan cu no ta sirbi ningun proposito, pasobra ora cu nan ta diseña pa protege un agresor y condena un victima, nan ta contrario na e espiritu di husticia. Con por ta posible pensa mes cu un doño di cas mester somete su mes na e boluntad di un ladron pa motibo di e temor di bay cera si e cause algun daño?
No ta e propietario ta comete e infraccion sino e ladron cu a penetra den su cas pa horta o causa daño na su famia. Logica y sentido comun ta bisa nos cu Ley mester ta completamente na banda di esun cu ta ser lesiona den su privacidad, no esun cu ta causa e lesion!


No tin ningun argumento cu por convencemi cu ora un intruso drenta den un cas, e unico cos cu e doño por haci ta grite “boo” pa mira si ta core bay, pasobra si e dal e un bala o propine un batazo, e ta bay cera! Y e ladron mes ta keda trankilamente riba caya pa bolbe comete su fechoria. E concepto mes di e Ley ey, manera cu e ta awor, ta contrario na razon!

Cua ta e temor cu e cambio di e Ley ey por provoca? Un proliferacion di armanan? Tin suficiente di nan caba na Aruba pa derota e argumento fofo ey. Cu un arma na cas por ta un peligro pa e doño o un di su famianan? E posibilidad ey ta existi, pero no por tuma prioridad riba e derecho (y hasta obligacion!) di defende un hogar y su ocupantenan di un o mas malandro cu no tin cunes cu nada!

Na Merca, por ehemplo, armanan na cas ta algo comun, y nan uso den caso di emergencia, o sea di defensa di famia y propiedadnan, ta completamente hustifica. Aya e lema “A man’s home is his castle” ta fundamental den e hustificacion di un accion defensivo contra un indeseado cu ta penetra den un hogar pa horta o causa daño fisico, y hasta mortal na su ocupantenan! Self-defense den semehante casonan ta tuma prioridad riba cualke otro consideracion.

E introduccion di un Ley di defensa personal contra intrusonan ta un necesidad na Aruba. Aki, e estadisticanan ta comproba un auge den criminalidad hopi procupante. Cualke persona cu mal intencion, apoya pa un poco di educacion y conocemento di Ley, sa cu e doño di un cas ta completamente na merced di un intruso, ya cu Ley ta prohibie di actua den e defensa propio di su hogar y su famia. Esey mester cambia.

Danki Dios cu tin un Andin Bikker cu ta pensa mas leu cu su nanishi y ta demostra su preocupacion y interes den e resguardo di hogarnan y famianan Arubiano. Mi ta completamente di acuerdo cu un Ley di defensa personal, ya cu mi no por rebaha mi mes pa entretene argumentonan filosofico insostenible, y cu no ta carga e aprobacion di realidad.

No ta cuestion di generaliza e adkisicion di armanan peligroso, o fomenta un anarkia di accion, sino di ofrece e doño di un hogar e apoyo di Ley den caso di cualke incidente di defensa propio cu awendia lo condene cu tur seguridad na un pasantiya largo den prison. Ley no por ta diseña nunca pa faborece delincuencia, sino pa condene!

- Advertisement -

DUNA COMENTARIO

Please enter your comment!
Please enter your name here