Delegacion di Zomerkarnaval na Cas di Aruba
ORANJESTAD(AAN)– Un delegacion di Zomercarnaval di Rotterdam a haci un bishita di cortesia diahuebs 29 di Juli na Cas di Aruba. Akinan e delegacion a keda ricibi pa Minister Plenipotenciario sr. Edwin Abath. E delegacion tabata consisti di presidente di e Fundacion di Zomercarnaval sr. Karel Willems, Reina di Ortel Zomercarnaval 2009 Naila Blancheville di e grupo Peopleo’s Choice, prome finalista Danielle Ramos di e grupo di carnaval Aruba Uni y segundo finalista Petra Smit di e grupo Kingdom under the Sun. Tambe tabata tin dos reportero di De Telegraaf kendenan ta haciendo un cobertura di e bishitanan e.o. na Cas di Aruba pa e website di De Telegraaf.
Sr. Abath a bisa di ta hopi complaci di ricibi e delegacion di Ortel Zomercarnaval na Cas di Aruba y tabata tin palabra di aprecio na e directiva cu ta haciendo un trabao inmenso den organisacion di e evento aki.
E mandatario a combersa cu e Reinanan ariba nan experencia cu e eleccion di Reina y tur e preparacionnan.
El a conta cu e mes na Aruba tambe ta participa den carnaval cu e grupo di Los Laga Bai.
Su persona ta hopi entusiasma pa presencia e carnaval di Rotterdam e fin di siman cu ta bin.
E mandatario a bisa cu e carnaval di Rotterdam ta simbolisa e harmonia cu ta existi na Hulanda entre e diferente gruponan etnico.
Sr. Willems a acentua e caracter multi-cultural di e carnaval di Rotterdam cu ta conta cu participacion di Antiano, Arubiano, Caboverdiano, Boliviano, Brasilero y hopi mas otro gruponan etnico.
Tambe cu e evento atrabes di añanan a crece y por conta cu casi un miyon di bishistante e diasabra di e parada grandi.
Alavaez sr. Willems a bisa cu tin hopi atencion di medionan di comunicacion tanto di region di Rotterdam como nacional fiha riba e evento aki.
Finalmente sr. Abath a haci entrega di un regalo na e tres Reinanan y a desea tanto directiva y participantenan na e di 26 edicion di Ortel Zomercarnaval na Rotterdam tur clase di exito diasabra cu ta bini.
