Dos Gobierno?
A bira obvio caba cu na Aruba nos tin dos gobierno, esun cu Pueblo a elegi, y esun cu MEP a laga atras pa defende su interesnan politico. Cua tin mas poder? Teoricamente esun cu Pueblo a escoge, pero pragmaticamente mira, esun di MEP parce di tin mas cos di bisa. AVP, despues di 10 luna den Gobierno, a cay den e mesun letargia di custumbra, o sea esun di “haci net net nada” contra esnan cu ta obstaculiza su gestion Administrativo.
KLM y Carnival Cruise Lines definitivamente ta dos logro deseable, pero cu ta carece di un importancia significativo. Durante campaña, ningun hende a tende AVP propaga cu e ta bay elimina “mitad” di B.B.O., pero en realidad ta esey so Gobierno por a logra te awor, hincando su mes den un posicion financiero mas precario, aunke corto di un cataclismo iremediable.
Mi ta duda seriamente cu nan lo por elimina e di dos mitad den un futuro cercano o hasta mediano. E relacionnan cu Hulanda a drecha, y por ta a bay mas leu di loke a ser spera, pero tampoco por mira ainda e beneficionan cu e lo aroha pa nos isla. Hulanda ta keda Hulanda y e Hulandesnan ta keda Hulandes, cu nan propio idiosincracia cu den hopi sentido ta in¬compatible cu esun di nos.
Politicamente, structuralmente, nos ta forma parti di Reino Hulandes, aunke geograficamente nos ta benta riba e costa norte di Sur America, mas cerca di cualke otro isla di Caribe, Sur America, Merca y Canada, cu di algun teritorio Europeo. Nos ta keda orguyoso di nos nacionalidad y nos presencia den Reino Hulandes, sin cu esey kier meen cu nos ta menos Arubiano pa loke ta trata sentimento nacionalista, especialmente si considera nos ubicacion fisico.
Cu tur consideracion pa e magnifico labor cu Otmar ta desempeñando, mi no ta vislumbra un aumento o crecimento drastico di nos prome pilar economico, o sea turismo. Ta mi opinion cu esey por drecha paulatinamente ora cu e economia Mericano mehora, y si e Gobierno di Hugo Chavez bira mas permisivo pa loke ta trata acceso na dolarnan Americano di parti di e poblacion Venezolano.
Ta di entre nan dos, Merca y Venezuela, nos por spera e anhelado crecimento den nos Turismo. E otro intentonan di trece turista di paisnan hopi mas distante, ta deseable, pero mas dificil pa logra. No ta facil competi cu e otro regionnan mas cerca di nan, cu ta ofrece nan loke nos no por ni soña di ofrece en cambio.
Y nos ta keda pega cu un Gobierno dentro di e Gobierno ac¬tual, cu aparentemente tin mas poder cu esun elegi, no pasobra Ley ta sancione, sino pasobra e Gobierno elegi (di AVP) no tin e curashi di haci loke e mester a haci for di un principio. Ta parcemi cu e indolencia di e ultimo Gobierno ante¬rior di AVP pa loke ta trata e seguidornan di e partido ta lo unico cu a continua den e Gobierno actual na e mesun ritmo di negligencia. Ningun hende ta suficientemente bobo pa spera di Gobierno algo cu e no por haci, pa Ley o pa interesnan politico, pero pa tolera, promove y faborece hendenan di e otro partidonan riba su seguidornan si ta parcemi ridiculo.
Hopi di esnan cu ta keha cerca mi relaciona cu e trato infame cu nan a haya o ta hayando di nan partido, ya a bay lague caba, loke ta facilita caba e pronostico di e resultado di e proximo eleccion. Ta dirigentenan hopi irealistico mes ta crea discordia cu esnan cu nan ta bay tin mester den proximo eleccion pa purba retene poder. Bira lomba pa net esnan cu por haci un diferencia ta absurdo, pasobra sin e apoyo incondicional di esnan cu por y ta cla pa yuda derota contrincantenan politico, no ta posible gana eleccion.
