Dos hende di edad respeta victima di ladronicia
ORANJESTAD.(AAN): — Dos hende grandi di 78 y di 66 aña di edad a bira vitima di ladronicia y e elementonan malandro ta liber canando rond den comunidad cu tur tranquilidad. Hendenan no por a defende nan mes tampoco y e ley cu ta roga pe pa habitantenan por tin derecho di defende nan mes den nan propio cas no a pasa ainda tampoco y parce cu lo kier inclui clausula cu finalmente toch e doño di cas ta keda perhudica si e actua pa proteccion propio.
Si tin persona cu sa of a tende of a wak diadomingo atardi pa mas o menos 5’or 30, un persona na careda den Bontemantel straat e reporta mesora warda pa polis pa asina logra pone man riba e elemento sin escrupulo aki.
Ta asina cu e diadomingo atardi a solicita presencia di patruya Oranjestad na un cas den e caya menciona. Patruya a presenta na e direccion y polis a atende e doño di cas cu ta un señora di edad respeta, di inicialnan J.P. naci na Colombia y e tin 78 aña.
E señora a splica polis cu el a descubri un homber ladron den su camber. E ladron lo a drenta den panico y a lanza su mes manera “flying thief”, bula pasa dor di bentana y desaparece den un fraccion.
E ladron bulado a logra baha bay cu tas di e denunciante cual tabata contene entre otro 15 DVD, memory stick y algun otro articulo . Denuncia a wordo tuma y e caso tin atencion di polis.
Mientras tanto na Jan Fleming tambe diadomingo mainta famia ta yama central di polis y ta reporta cu ladron a kibra porta drenta y plunder tur locual ta cos di come.
Patruya Santa Cruz a bay na e direccion y a atende e señora di inicialnan M.P. di 66 aña. Segun e señora su version cu boef (nan) lo a kibra porta drenta habri frigider y freezer y horta tur locual cu e tin pa come.
Awor e pober señora di 66 aña tambe a bira victima di malandronan sin escrupulo di horta tur su articulonan cu e tin warda pa e cushina pero e ladron a lage plan bari. Gobierno auxilio comunidad no por sigui bida tras di trali y ladronnan ta cana liber y ta hasi y deshasi. Trata e ley y pasa e ley pa doño cas por defende su mes den su hogar.
